Şîdetê vera cinîyan her serre beno zêde. Rixmê naye serra 2019î de cinîyan warê grevê vêşanîye, çalakîyê vera şerî û muxabîrîye ca nêverdayî. Cinîyî bi pîlkerdişê têkoşînî dest pê serra 2020î kenê
Vervatoxa Platformê Rojnamegeran ê Cinîyan ê Mezopotamya Ayşe Guney têkoşînê cinîyan ê serra 2019î ercna.
Guneye ard ziwan ke serra 2019î seba cinîyan bîye serrêka têkoşînî yê xoverdayîşî û vat: “Ma serrêka winasêne xo pey de verdenê ke şîdetê vera cinîyan, tacîz, teda û qirkerdişî zaf êde bîye. Grevê vêşanîye yo ke rayberîya Leyla Guven de ame kerdene mora xo daye na serre. Hêrişê vera Rojawanî de zî cinîyî verê cepheyanê xoverdayîşî de bîyî. Bi kampanyaya ‘Seba vurnayîşî û azadîye ti zî wurzê payan ser’ cinîyan rojdemêko newe awan kerd. Peynîya serre de çalakîyê ke bi dansê ‘Las Tesîsî’ yê cinîyanê Şîlî dinya ser o vila bîyî vurîyayî bîyî hacetê têkoşînê hemparî. Zaf dewletî herinda çareserkerdişê meseleyan polîtîkayanê şerî xebitnenê. Bêguman nê polîtîkayî tewr zaf kurdan û cinîyanê kurdan ser o tesîr kenê ke şer de yê. Cinîyanê kurdan vera nê polîtîkayan tewirêko xurt mojna la heyfo ke medyaya komelkî û medyaya pêroyîye de nê tewirî nêameyî mojnayene. Xoverdayîş ame manîpulekerdene. Bi xeberan ame watene ke xoverdayîşê cinîyan bêro çinkerdene. Labelê cinîyan bi paştdayîşî xoverdayîşê xo pîl kerd û rêxistina ‘Cinîyî pîya xurt ê’ awan kerde. No seba cinîyan destkewteyêko pîl bi.”
“Tirkîya de 149 rojnamegerî tepişte yê. Sebebê tepiştişê înan xeberê înan û cigêrayîşê seba xeberan ê. Vera rojnamegeran tedaya pîle esta labelê na teda Kurdîstan de zêde ya. Vera rojnamegeranê cinîyan na teda hîna giranêr bena. Nika 12 rojnamegerê tepişteyî zîndanan de yê. Hema ma vajê ke embazêka ma nêmende ke ci rê dewa nêameye akerdene. Ma bi eşkerakerdişê raştîyan cewab danê na teda û bi nê hawayî ê xo ver danê. Cinîyê ke bi xoverdayîşê xo tarîx nuşt xoverdayîşê xo serra 2020î de do pîlêr bikê û têkoşînê xo bivurnê têkoşînêkê hemparî.” STENBOL
