Rêveberiya Kampa Holê zaroka êzdî Mehwer Semîr Reşo ku ji hêla çeteyên DAIŞ’ê ve hatibû revandin û li kampê dima, radestî Meclisa Mala Êzdiyan a Kantona Cizîrê kir
Çeteyên DAIŞ’ê di 3’yê tebaxa 2014’an de êrîşî Şengal kir. Di êrîşê de bi hezaran êzdî hatin qetilkirin û zêdetirî 5 hezar keç û jinên êzdî jî hatin revandin. Kesên hatin revandin jî ber bi herêmên Iraq û Sûriyeyê yên di bin dagirkeriya DAIŞ’ê de bûn ve birin.
Di encama pêngavên şervanên Hêzên Sûriyeya Demokratîk (HSD) yên li dijî DAIŞ’ê de bi sedan jin û zarokên êzdî hatin rizgarkirin. Kesên hatine rizgarkirin jî bi rêya desteya jinan û Meclisa Mala Êzdiyan gihandin malbatên wan ên li Şengalê.
Rêveberiya Kampa Holê zaroka êzdî Mehwer Semîr Reşo ku li nava malbatên çeteyên DAIŞ’ê de dima, hilgirt û radestî Meclisa Mala Êzdiyan a Kantona Cizîrê kir. Hat zanîn ku Mehwer Semîr Reşo ji gundê Herdan ê Şengalê ye.
Mala Êzidiyan piştî ku jinên êzdî werdigire, bi Meclisa Rêveberiya Xweser a Şengalê re dikeve nava pêwendiyan û radestî malbatên wan dike. Li gorî agahiyên meclisê, meclisê heta niha zêdetirî 53 jinên êzidî radestî malbatên wan kirine. HESEKÊ
