Parlementerê HDPyî yo verên Ferhat Encuyo ke derheqê Roboskî de qisey kerd û va: “Dewlete ma rê zaf zext kerd ke ma nê têkoşînî caverdê la ma çirey peyser game nêeşte. Qirkerdişê Roboskî bi zanayîş û plankerde ame kerdene.”
Qirkerdişê Roboskî yo ke dewleta tirke 19ê înan domanî 34 kurdî qetil kerdî ser ra 8 serî vîyartî la seba keyeyan û şarê kurdî dejê qirkerdişî sey roja verên o. Parlementerê Partîya Demokratîke ya Şaran (HDP) yo verên Ferhat Encuyî bi wesîleya serrgêra qirkerdişî derheqê têkoşînê înan û hêrişê dewlete ê vera înan de qisey kerd.
Encuyî vist vîrî ke seba ke vernîya têkoşînê înan bêro girewtene û Roboskî bêro vîrrakerdene dewlete her hetî ra înan rê hêriş kerd û vat: ‘‘Vera şarê Roboskî tepiştiş ra heta cezayan tim zext ame kerdene ke ma têkoşînê xo caverdê. La ma rixmê heme hêrişan wayîr têkoşînê xo vejîyayî û peyser game nêeşte. Qirkerdiş xora seba keyeyan û komelî bi sebebê travma. La qewimîyayîşê badê qikerdişî na tiravama hîna kerde girane. 19ê înan domanî 34 kesan cuya vînî kerde. keyeyan bi nenguyanê xo bedenê domananê xo yê perçekerdeyî binê enqazî ra vetî. Meyîtî zereyê heqîbeyan de serê qatiran de ameyî kiriştene. Dewleta ke no qirkerdiş kerd badê ci zî na travma hîna kerde girane. Ma zî vera înan tewirê xo ramot û têkoşîn kerd. Seba ke hînî qirkerdişê sey Roboskî merê kerdene ma xo ver da û ma do têkoşînê xo rê dewam bikerê.
Encuyî wina dewam kerd: “Tim û tim vera ma bi dewa û tepiştişan zext yeno kerdene ke ma peyser game bierzê la ma çirey peyser game nêeşte do meerzê. No çîyêko normal nîyo 40 deka bombardûman dewam keno la verê ci 12 saetî de derheqê înan de cigêrayîş yeno kerdene bi heronan yenê taqîpkerdene. No zî ramojneno ke no qirkerdiş plankerde ame kerdene. Bade qirkerdişî herinda cazakerdişê qetilkeran de keyeyê ke domanê xo vînî kerdî ê ameyî cezakerdene. Xora ma ewro vînenê ke têna qikerdişê Roboskî nêbi. Cizîre, Sûr reyna Til Rifat de zî vera doman qirkerdiş ame kerdene. Na polîtîkaya dewlete bizanayîş yena caardene. Na polîtîkaya herişkare vera kurdan bizanayîş yena rayraberdene. Ma do vera naye bêveng nêmanê. Hem semedê edaletî hem zî semedê demokrasî û azadîye do têkoşînê ma dewam bikero.”
Encuyî bale ante qerarê Mehkemeya Heqanê Merdiman ya Ewropa (MHME) yê derheqê deweya Roboskî ser û vat: “No qerarêko sîyasî yo. Naye ra wa şikê kesî çînê bo. La huqûqnasanê ma yê ke dosya teslîmê înan kerd kêmîya înan zî esta.” ŞIRNEX
