Polîsên trafîkê yên ku ji bo lêkolînkirina qetilkirina ciwanê bi navê Cîhan Can hatin cihê bûyerê, xwestin belgeya ‘Cîhan Can di bûyerê de bi qisûre’ bi malbatê bidin îmzekirin. Lê malbatê ev hewldana veşartina cînayetê red kir
Hêzên polîsên çevîk ên dewleta tirk şeva din li ber avahiya HDP’ê ya Amedê bi seyareyê li ciwanê bi navê Cîhan Can (33) ku endezyarê înşaetê bû xist û Can qetil kirin. Ji bo otopsiyê jî cenazeyê Can rakirin Nexweşxaneya Dewletê ya Selahattin Eyyubî. Îro di danê sibehê de jî malbata Can cenazeyê kurê xwe ji morgê wergirtin û li Goristana Yenîkoy a Amedê defin kirin. Malbat şîna kurê xwe li Mala Şînê ya Hevedanê qebûl kir û dê şîn 3 rojan bidome.
Piştî bûyerê polîsên ku li cihê bûyerê lêkolîn kirin, Can ‘bi qisûr’ dît û xwestin ku belgeya ‘Can bi qisûre’ bi malbatê bidin îmzekirin. Lê malbatê ev yek red kir û belge îmze nekir. Li ser vê yekê jî polîsên ji bo lêkolînê hatin, ji cihê bûyerê çûn.
Li gorî agahiyan, ji ber cînayetê heta niha polîsek hatiye binçavkirin. Hat zanîn ku polîsê hatiye binçavkirin dê îro sewqî dadgehê bê kirin. AMED
