YCÊ’yê li Şengalê bi navê Hevrîn Xelef dewreya perwerdeya futbolê da destpêkirin. Ciwanan da zanîn ku wan ji bo bîranîna Xelef navê wê li dewreyê kirine
Yekitiya Ciwanên Êzdî (YCÊ) li Şengalê dewreya futbolê dan destpêkirin. YCÊ’yê ji bo bîranîna sekretera giştî ya Partiya Pêşerojê ya Sûriyeyê Hevrîn Xelef ku ji hêla dewleta tirk û çeteyên wê ve li Rojava bi hovane hatibû qetilkirin, navê ‘Dewreya futbolê ya ji bo bîranîna Şehîd Hevrîn Xelef’ li dewreyê kir. Di dewreyê de 10 tîmên ji gund û bajarokên Şenalê cih digirin.
Têkildarî mijarê ciwanê bi navê Bercis Celal axivî û anî ziman ku Hevrîn Xelef ji hêla dewleta tirk ve bi hovane hate qetilkirin û wan jî ji bo bîranînê, navê wê li dewreyê kiriye. Celal da zanîn ku bi vekirina dewreyên wiha gelek keyfxweş dibin û ev yek dibe sedema pêşketina ciwanan. Celal hêvî kir ku di demên pêş de beşdarî pêşbirkên navneteweyî bibin.
Hat zanîn ku dewreya futbolê dê 10 rojan bidome. ŞENGAL
