Mamoste û parêzerên Hewlêrê anîn ziman ku di rewşa heyî de lidarxistina Kongreya Neteweyî ya Kurdistanê dê bibe sedem ku mafên gelê kurd mîsoger bibin. Parêzer Karzan Reşîd wiha got: “Ji bo sala nû tenê hêvî û daxwaza min lidarxistina kongreya neteweyî ye.”
Bi salane ji bo yekitiya neteweyî ya gelê kurd gelek hewldan tên kirin. Bi taybet Kongreya Neteweyî ya Kurdistanê (KNK) li her çar parçeyên Kurdistanê ji bo lidarxistina kongreya neteweyî û yekitiya neteweyî bi hemû partiyên kurdan re hevdîtinan dike. Têkildarî girîngiya kongreya neteweyî mamosta û parêzerên Hewlêrê ji Rojnewsê re axivîn.
Der barê mijarê de mamostayê bi navê Ferman Fetah anî ziman ku di rewşa niha de ji bo gelê kurd lidarxistina kongreya neteweyî pewîstiyeke û wiha domand: “Li herêmê nakokî hene û bi taybet jî li herêmên ku kurd lê dijîn. Ji ber vê yekê lidarxistina kongreya neteweyî gelek girînge û divê tenê peyameke kurdan hebe. Ji bo vê jî pêwîstiya kurdan bi yekitî û kongreya neteweyî heye. Lê pêwîste ji bo ku peyamek tenê derkeve, hemû aliyên Kurdistanê li her çar parçeyan danûstandinek bi hevre bikin û yek bin.”
Tekane daxwaza wî..
Parêzer Karzan Reşîd jî anî ziman ku ji bo sala nû daxwaza wî ew e ku Kongreya Neteweyî ya Kurdistanê bê lidarxistin û wiha bi dawî kir: “Ji bo ku mafên rewa yên gelê kurd mîsoger bibe, êdî em dixwazin kongreya neteweyî ku hemû aliyên siyasî yên her çar parçeyên Kurdistanê di nav de bin bê lidarxistin. Ger kongreya neteweyî were lidarxistin, dê maf û daxwazên gelê kurd ên her çar parçeyên Kurdistanê bên parastin.” HEWLÊR
