HSD’ê bi daxuyaniyekê bîlançoya şer û pevçûnên di 27, 28 û 29’ê kanûnê de parve kir. HSD’ê diyar kir ku hêzên dagirker êrîşî qadên sivîlan kir û sivîlên rastî êrîşê hatin neçar man ku ji herêmê koçber bibin
Navenda Ragihandin û Çapemeniyê ya Hêzên Sûriyeya Demokratîk (HSD) encamên şer û berxwedana di navbera 27 û 29’ê kanûnê de bi daxuyaniyeke nivîskî parve kir. HSD’ê diyar kir ku artêşa tirk a dagirker û komên çete li herêmên Til Temir, Serêkaniyê û Eyn Îsayê bi çekên giran û obusan êrîşî qadên sivîlan kirin.
HSD’ê destnîşan kir ku komên çete yên girêdayî dewleta tirk bi obûsan êrîşî gundê Xalidiyê û Hoşan ên Eyn Îsayê kirin. HSD’ê diyar kir ku hêzên dagirker bi piştgiriya balafirên bêmirov, çeperên hêzên artêşa Sûriyeyê û herêmên sivîlan ên gundên Kopirik, Erîda, depoyên genim ên Qizalî, Fatisa, Bîr Îsa û Bîr Timih ên Eyn Îsayê jî bi dijwarî topbaran kirin. HSD’ê da zanîn ku di encama êrîşê de şêniyên herêmê neçarî koçberiyê bûn û ziyanên madî pêk hatin. HSD’ê ragihand ku di bersivdayîna hêzên artêşa Sûriyeyê de herî kêm 5 çete û leşkerên artêşa tirk hatin kuştin.
Êrîşên li Reqa û Dêrazorê
Di berdewamê de jî HSD’ê ragihand ku komên çete bi çekên giran êrîşî gundê Mişrefa yê Serêkaniyê jî kir û di encamê de ziyan gihişt mal û milkê welatiyên herêmê. Daxuyaniya HSD’ê wiha dom kir: “Şaneyên veşartî yên DAIŞ’ê li herêmên Reqa û Dêrezorê bi bombeyên destan êrîşî baragehên hêzên me kir. Di dîroka 28’ê mehê de komeke ji şaneyên veşartî yên DAIŞ’ê êrîşek li dijî şervanên HSD’ê kirin. Di encama pevçûna di navbera hêzên me û çeteyan de 2 çete hatin kuştin û 3 çete ji cihê bûyerê reviyan.”
Herî dawî jî HSD’ê ev agahî dan: “Di encama topbarana artêşa tirk a dagirker de li gundewarên Eyn Îsayê 2 hevalên me şehîd bûn.”
