Serekê Şaredarîya Hênê yê AKPyî Îbrahîm Lale Raşteyê Batikentî yê Amedî de erazîyê bêîmar ser de dest bi viraştişê awanîya qaçax kerd
Serekê Şaredarîya Hênê yê AKPyî Îbrahîm Lale Raşteyê Batikentî yê qezaya Rezan ya Amedî de erazîyê bêîmar ser de dest bi viraştişê di sehayê futbolî yê xalî yê qaçaxe û salonêk veyveyî kerd. Lale verê cû zî mîyanê erazîyo ke keweno sînorê qezaya Yenîşehîrî de kargehêk viraştbî û nika zî çim verda erazîyê mende ser. 15 teşrîna peyêne de dest bi viraştişê awanîyan kerd. Balkêşo ke makînayê kar yê bêplaka viraştişê awanîyan de xebetîyenî.
Sewbîna trafê nizdî ra cereyanê qaçax antî û her çiqas ke gereyê cereyanê qaçax bêro kerdene zî DEDAŞ tu çîyêk nêkerd.
Yeno vatene ke Lale ge-ge yeno zîyaretê viraştişê awanîyan û tewr peynî 24ê kanûne de bi wesayîtê xo yê şaredarî ameyo zîyaretê awanîyanê xo yê qaçaxan û kontrol kerdo.
Ame îdîakerdene ke badê ke destûrê Serekê Şaredarîya Rezan ya AKPyî Huseyîn Beyoglu ameyo girewtene dest bi viraştişê awanîyan ameyo kerdene. AMED
