HRE’yê da zanîn ku hêzên wan di 30 û 31’ê kanûnê de li gundên Bab û Ezazê li dijî hêzên dagirker çalakiyên sabotajê pêk anîn. HRE’yê diyar kir ku di van çalakiyan de herî kêm 7 çete birîndar bûn
Hêzên Rizgariya Efrînê (HRE) bi daxuyaniyeke nivîskî çalakiyên hêzên wan ên li Efrîn û derdora wê yên li dijî hêzên artêşa tirk a dagirker û çeteyên wê daxuyaniyeke nivîskî weşand. HRE’yê da zanîn ku hêzên wan çalakiyên xwe yên li dijî hêzên dagirker bênavber didomînin.
HRE’yê diyar kir ku hêzên wan di 30’ê kanûnê de li gundê Tiwês ê herêma Babê li dijî koma çete ya Lîwa Weqas a girêdayî dewleta tirk çalakiya sabotajê pêk anî û di encamê de 3 çeteyên koma navborî birîndar bûn. HRE’yê destnîşan kir ku di 31’ê kanûnê de jî hêzên wan li gundê Soran ê Ezazê li dijî çeteyên girêdayî ‘Polîsên leşkerî’ çalakiyeke sabotajê pêk anîn û di çalakiyê de 4 çete birîndar bûn.
Di berdewamê de jî HRE’yê da zanîn ku hêzên dagirker ên dewleta tirk û çeteyên wê gundên Soxanekê, daristanên Soxanekê û Aqîbê yên Şêrawayê û gundên Merenaz, Malikiyê û Şewarxa yên Şera ya Efrînê topbaran kirin. HRE’yê daxuyand ku nêzî 70 topên obusê li herêmên navborî ketin. HRE’yê ragihand ku di heman demê de ji duh ve artêşa tirk a dagirker tevgera balafirên keşfê li ser navçeya Şêrawa û Şerayê dabû destpêkirin û tevger hêj didome.
