Hêzên Talîban li Efxanistanê sê êrîş pêk anîn. Li gorî agahiyan, di encama van êrîşan de herî kêm 23 leşker û polîsên Efxanistanê hatin kuştin
Li Efxanistanê di nava 24 saetan de hêzên girêdayî Talîban li eyaletên bakurê welat sê êrîş pêk anîn. Hat zanîn ku hêzên Talîban li herêma Balhê bi ser qereqolê de girtin. Li gorî hin rayedaran 7 û li gorî endamekî meclisa eyaletê jî 9 polîs di vê êrîşê de mirin û 4 polîs jî winda ne.
Li navçeya Daşte Arşî ya Eyaleta Kunduzê jî hêzên Talîban di nîva şevê de bi ser bendeke kontrolê de girtin 9 endamên ewlekariyê kuştin. Her wiha heman hêzan li navçeya Dardak a li ser sînorê Tacikistanê jî bi ser bendeke kontrolê de girtin û 7 endamên ewlekariyê kuştin.
Hêzên Talîbanê ku beriya zivistanê navber dida çalakiyên xwe, bi destpêkirina biharê re jî dest bi pêngavan dikir. Her wiha Talîbanê di roja duşemê de jî daxuyanî dabû û diyar kiribû di navbera wan û DYA’yê de muzakere hene û di van muzakreyan de ew ê agirbestê nekin. KABÎL
