Welatiyên Ranyayê destnîşan kirin ku di vê serdema hesas de pêwîstiya kurdan bi yekitiya neteweyî heye. Welatiyan got ku divê ew destên nakokiyê dixin navbera kongreya neteweyî û yekitiya kurdan bên jêkirin
Welatiyên Ranya ya Silêmaniyê têkildarî girîngiya yekitiya neteweyî ya gelê kurd û astengiyên li pêşiya avakirina yekitiyê ji Rojnewsê bi Mihemed Hesen re axivîn.
Ji welatiyan Yûsif Cehfer anî ziman ku lidarxistina kongreya neteweyî ji bo gelê kurd hewcehiyeke û wiha got: “Li her aliyekê Kurdistanê dijmin hene. Dijminên Kurdistanê li dijî kurdan zalim in û li Kurdistanê dagirker in. Piştgiriya terorê dikin. Lewma jî pêwîstiya kurdan bi yekitî û yekhelwestiyê heye.”
Di berdewamê de jî Cehfer diyar kir ku pêwîste di rewşeke wiha yê hesas de divê kurd yekitiya xwe ava bikin û wiha dom kir: “Karekî zehmete lê divê ji bo avakirina yekitiyê xebateke cidî bê kirin. Daxwaza min ji gelê kurd ew e ku li pey partiyan neçin û berjewendiyên neteweyî esas bigirin. Ev partî bûne darê destê dagirkeran û bûne nokerên dagirkerên Kurdistanê.”
‘Ez ji rêveberiya Başûr bigumanim’
Welatiyê bi navê Omer Çavşîn jî destnîşan kir ku li her çar aliyên Kurdistanê nakokiyên aliyên siyasî xwedî dîrokeke kevne û wiha derbirî: “Ev jî dike ku hêzên hegemon û dewletên cîran berjewendiyên xwe li ser xaka me pêk bînin. Di serî de divê ew destê ku nakokiyê dixe nava kongreya neteweyî û mala kurdan were jêkirin. Ez ji rêveberiya Başûr bigumanim. Bi saya rêveberiya kurd, ji hêlekê dewleta tirk û ji hêla din jî Iraq û Îran êrîşî me dikin. Divê ev partî ji destê welatên herêmî bên derxistin. Divê hemû partî rêzê ji hev re bigirin. Bila êdî kes nebêje ez Bakur, Başûr, Rojhilat û rojavayî me. Ev nayê qebûlkirin. Pêwîste hemû alî xwe yekalî bikin.” SILÊMANIYE
