Şarê Amedî vera Partîya Vatan a ke wazena sembol û nameyê Şêx Seîd û Seyîd Rizayî bêrê wedartene, hêrsê xo ard ziwan û vat ma do wayîrê erjanê xo bivejîyê
Partîya Vatene Amed û Dêrsimî de muracat kerdbi ke wa name û sembolê Şêx Seîd û Seyîd Rizayî bêrê wedartene. Vera naye nêrazîbîyayîşê dewam kenê. Şarê Amedî no sey hêrişê vera kultur û destkewteyanê kurdan hesibna û vat Ma do wayîrê erjanê xo bivejîyê.
Hemwelatijan ra Ramazan Bulduyî vist vîrî ke Şêx Seîd seba kurdan alîmêko zaf muhîm o û vat: ‘‘No hetêk ra zî hêrişê vera dînî yo. Hema ke cayê mezelê Şêx Seîdî nêbîyo eşkera nika zî wazenê nameyê ci meydan ra wedarî. Ma naye qebûl nêkenê.‘‘
Salîh Tolîdarî zî bale ante ser ke Perînçek bi paştdayîşê dewlete wina qisey keno û vat: ‘‘Perînçek û êyê ke sey ey bi dişmenîye hêrişê kurdan kenê do pelanê tarîyan ê tarîxî de bibê vînî û bi wayîrvejîyayîşê şarê kurdî mezelê Şêx Seîd û Seyîd Rizayî bêrê vînayene.‘‘
Hedîye Yildiz zî derheqê babete nêrazîbîyayîşê ramot û vat: ‘‘Vat Şêx Seîd û Seyîd Riza kulturê ma yê. Babî û pîrîkanê ma ra nata tim nameyê înan esto û do tim bibo. Ê wazenê ke şarê kurdî werte ra wedarê. Ma înan ra çîyêk nêwazenê wa ma ra dûr vinderê.‘‘
Îmam Mutluyî zî hêrsê xo bi nê vatişan ard ziwan: ‘‘Perînçek û partîya ci nêeşkenê derheqê erjanê ma de qisey bikerê. Tarîxî ra kurdan rê dişmenîye kenê wa hînî naye ra fek bidê war. Ma do wayîrê erjanê xo bivejîyê.‘‘
Abdulmelîk Çelîkî zî ard vîrî ke tim vera kultur, din û ziwanê kurdan hêrişêk esto û vat: ‘‘Şêx Seîd û Seyîd Riza seba kurdan erjêkê cîyayê. Vera kurdan polîtîkaya hêrişkare yena caaerdene. Ê se kenê wa bikerê ma erjanê xo rê giredayeyê û do wayîrê înan bivejîyê.” AMED
