Bîlançoya şewata li Awûstralyayê her ku diçe girantir dibe. Hat zanîn ku ji ber talûkeya şewatê, sed hezar welatiyên din ji herêmên cuda koçber bûn
Li Awûstralyayê germahiya hewayê derket ser 40 pileyan. Ji ber bayê bi şid, şewata daristanê zêdetir dibe. Ji ber şewata li welat, di roja şemiyê de bi dehhezaran welatî neçarî koçberiyê bûn. Li bajarên tûrîstîk jî niha kes lê nemaye.
Di heman demê de ferman hate dayin ku li sê eyaletan 100 hezar welatî koçber bikin. Her wiha serokwezîrê Awûstralyayê Scott Morrîson ji ber şewatê bang li 3 hezar leşkeran kir. Ev jî seferberiyeke mezin e.
Heta niha di encama şewatê de 23 welatiyan jiyana xwe ji dest dan û bi dehan kes jî winda ne. Di heman demê de herî kêm hezar û 300 mal jî bi temamî şewitîn.
Pisporên Zanîngeha Sydneyê diyar kirin ji dema ku ev karesat hatiye destpêkirin û heta niha nêzî zêdetirî 500 milyon heywan jî mirine. SYDNEY
