Fadîle Tosun a ke lajê ci Qirkerdişê Roboskî de wefat kerd pare kerd ke lajê ci yo bîn Qirkerdişê Roboskî ra dima tewrê PKKyî bi
Dewleta tirkî heta nika çarçewa polîtîkayanê qirkerdişê kurdan de bi seyan qirkerdişî kerdî. 28ê kanûna 2011î de zî nê qirkerdişan ra yew ame meydan. Teyarayanê şerî yê F16î yê dewleta tirkî dewa Roboskî ya Qilabanî ya Şirnexî de bombayî varnayî merdimanê sivîlan ser ke mabênê Vakur û Başûrê Kurdîstanî de bazirganîya sînorî kerdêne û 34 qetil kerdî.
Qirkerdişî ra dima 8 serrî vîyartî. Dewlete vatişê ‘qirkerdiş’ qedexe kerd. Keyeyê 34 kesan têkoşînê xo ra anêgêrayî .Seba ke kiştoxî bêrê dîyene û hukmkerdene keyeyan têkoşîn kerd. La derheqê keyeyan de dewayî ameyî akerdene û endamê keyeyan ameyî tepiştene.
Qirkerdişî ra dima tewrbîyayîşê ciwananê Roboskî yê Têkoşînê Azadîye yê Kurdistanî bi zêdê. Ramazan Tosun zî ciwananê Roboskî ra yew o ke Qirkerdişê Roboskî de kekê ci ame qetilkerdene. Dadîya ci Fadîle Tosun ard ziwan ke lajê ey Ramazano ke qezaya Qilabanî yê Şirnexî de ame dinya domanîya xo de yewo jîr û xebatkar bi. Dadîya ci vat: “Lajê mi zaf biaqil û serkewte bi. Coka babîyê ci o dibistanêka taybete ya Dêrgule rê qeyd kerd. Lajê mi qetilkerdişê kekê xo ra dima waşt ke qesasê ci bigêro. Çîyo ke kekê ci rê ame kerdene qet qebul nêkerd. Rojêke bi karwan şi qaçaxîye û anêgêra. Ramazan qetilkerdişê birayê xo ra 3 serran dima tewrê gerîlayan bi.”
Dadîye Tosune îfade kerd ke lajê ey Ramazan 11ê tebaxa 2018î de şehîd bi û vat: “Rojêke mi televîzyon de dî ke lajê mi şehîd bi. Ma dewe de xeyma serweşîye akerde. Dewlete dormeyê xeyma ma girewt. Nêverdêne ke çew bêro serweşîye. Wexto ke Ramazan şi koyan ser, zaf ciwanî zî dima şîyî tewrê gerîlayan bîyî. Zaf ciwanê ke şîyî koyan keyeyanê înan de şehîdê Qirkerdişê Roboskî estbî. Têna keyeyê ma ra 3 ciwanî şîyî.” ŞIRNEX
