Komeleya Rojnamegeran ya Dîcle Firatî (DFG) awankerdişê xo bi eşkerayîyêka çapemenîye bînaya xo ya Amedî de îlan kerd
Komeleya Rojnamegeran ya Dîcle Firatî (DFG) awankerdişê xo bi eşkerayîyêka çapemenîye bînaya xo de îlan kerd û raporê 2019î yê binpaykerdişê heqanê rojnamegeran eşkera kerd. Hemsereka DFGyî Dîcle Muftuoglu, Serdar Altan û komêka rojnamegeran kombîyayîş de amade bîyî.
Hemserekanê Komeleya DFGyî Dîcle Muftuglu û Serdar Altanî armancê komeleye ser o qisey kerd û rapor pare kerd. Hemserekê DFGyî Altanî vat: “Ma do bibê vengê komelî. Rojnamegerê ke rastîye roşnî kenê û rastê teda yenê ma do heqanê înan bipawê. Ma do her menge raporan pare bikê.”
Hemsereka DFGyî Dîcle Muftuoglu zî waşt ke tedaya vera rojnamegerîye biqeda û eşkerayîya DFGyî wende.
Eşkerayîya DFGyî wina ya: “Sere de welatê ma de rojnamegerîye binê rewşêka zaf girane de ya. Nê prosesî de ma sey tay rojnamegeran kom bîyî û Komeleya Rojnamegeran a Dîcle û Firatî awan kerde. Tedaya vera rojnamegerîye bîye zêde. Ma bawer kenê ke bi awanbîyayîşê komeleya ma na teda bena kêm. Ma do her ca de xo rêxistin bikê û heqanê rojnamegeran bipawê. Ma do bi xebatanê xo êyê ke nênê dîyene bidê dîyene û êyê ke nênê eşnawitene bidê eşnawitene.
Heyfo ke Tirkîya de tedaya vera rojnamegeran zaf zêde ya. Rojnamegerê ke vera îqtîdarî têgêrenê nêeşkenê bi asanî karê xo bikê. Tirkîya hetê binpaykerdişê heqanê rojnamegeran ra dinya de rêzê yewînî de ya. Se rojnamegeran ra zêdêr rojnamegerî bika azadîya xo ra dûrî yê. Rojnamegerî xeberanê xo û vilakerdişê medyaya komelkî ra yenê hukmkerdene û tepiştene.
Tewr peyênî de hemkarê xo rojnameger Azîz Oruç bi asanî sey ‘terorîst’ ame îlankerdene. Ma reyna veng danê ke wa embazê ma Azîz Oruç cade bêro veradayene. Ganî pêro rojnamegerê tepişteyî bêrê veradayene. Tewirê îqtîdarî mojneno ke Tirkîya bîya zîndanê rojnamegeran. Panc serranê peyênan de nasnameyê 3 hezar û 804 rojnamegeran ameyî batalkerdene. Têna serra 2019î de bi seyan rojnamegerî karî ra ameyî dûrvistene.
Serra 2019î seba rojnamegeran bîye serra bêhuqûqîye. Doneyê ke ma raporê xo de eşkera kerdî mojnenê ke Tirkîya de azadîya çapemenîye çin a. Prosesê winasênî de ma do bibê vengê rojnamegeran û paştî bidê hemkaranê xo. Pêro xebata ma seba roşnîkerdişê rastîye biba. Ma venga hemkaranê xo danê ke ma binê na komele de bibê yew. Eke ma nêbê yew, ma nêeşkenê teda û zorîye ra derbaz bibê.
Şîdet û Tedaya Vera Rojnamegeran a Serra 2019î
* 75 rojnamegerî ameyî destbendkerdene.
* Polîsan eşt keyeyanê 17 rojnamegeran.
* 24 rojnamegerî ameyî tepiştene.
* Vera 14 rojnamegeran hêriş ame kerdene.
* 44 rojnamegerê ke xeberan teqîb kerdêne ameyî astengkerdene.
* Derheqê 33 rojnamegeran de tehqîqat dayîye destpêkerdene.
* Derheqê 30 rojnamegeran de dewayî ameyî akerdene.
* 477 rojnamegerî ameyî hukmkerdene.
* 72 rojnamegerî ameyî cezakerdene.
* 2 rojnamegerî sînorî ra ameyî teberkerdene.
* 130 rojnamegerî tepişte yê.” AMED
