HSD’ê bi daxuyaniyekê ragihand ku artêşa tirk a dagirker û çeteyên wê di sê rojên dawî de bi çekên giran gund û qadên sivîlan hedef girtin. HSD’ê da zanîn ku Hêzên Erka Xweparastinê jî hewldaneke êrîşê ya çeteyên DAIŞ’ê li Dêrazorê vala derxist
Navenda Ragihandin û Çapemeniyê ya Hêzên Sûriyeya Demokratîk (HSD) bi daxuyaniyeke nivîskî bîlançoya êrîşên 3 rojên dawî ragihand.
HSD’ê di daxuyaniyê de diyar kir ku artêşa tirk a dagirker û çeteyên wê li herêmên Til Temir û Eyn Îsayê bi çekên giran û obusan qadên ku sivîl lê ne bi dijwarî topbaran kirin. HSD’ê da zanîn ku komên çeteyan li gundên Raşidiyê, Bab û derdorê yên Til Temirê hedef girtin û bi awayeke dijwar topbaran kirin.
Di berdewamê de jî HSD’ê destnîşan kir ku artêşa tirk a dagirker bi çekên giran, hawan û obusan gundên Um Hiwêş, Kor Hesen, Xirbit Beqar, El Dibis, El Xaldiyê û xwaringeha Seqir a nêzî gundê Xaldiyê yên Eyn Îsayê jî bi dijwarî topbaran kir. HSD’ê da zanîn ku komên çete jî hewl dan di bejahî de êrîşî baregehên hêzên artêşa Sûriyeyê bikin û di encama êrîşê de ziyanên madî gihîşt niştecihên herêmê.
Hewldana çeteyan vala hat derxistin
Daxuyaniya HSD’ê wiha bi dawî bû: “Hêzên Erka Xweparastinê hewldaneke êrîşa roketan a şaneyên veşartî yên DAIŞ’ê li herêma Dêrazorê vala derxistin. Êrîşa çeteyên ku amadekarî dikirin ku bi hejmareke zêde ya roket û mayinan êrîşeke mezin bibin ser baregeh û çeperên Erka Xweparastinê û hêzên sînor ên li Dêrezorê, bi saya operasyoneke taybet a Hêzên Erka Xweparastinê hate astengkirin. Di encama operasyonê de hejmareke zêde ya roket û cureyên din ên teqemeniyê hatin desteserkirin.”
