Roniştişê doza Hemserekê Pêroyî yê HDPyî yê verên Selahattîh Demîrtaşî ke verê cû na doze ra ameybî veradayene, labelê reyna zî tepişte yeno muhakemekerdene, 19. Mehkemaya Cezaya Girane ya Anaqara de Kampusê Zîndanê Sîncanî de dest pêkerd
Roniştişê doza Hemserekê Pêroyî yê Partîya Demokratîke ya Şaran (HDP) yê verên Selahattîh Demîrtaşî verê cû na doze ra ameybî veradayene, labelê reyna zî tepişte yeno muhakemekerdene, 19. Mehkemaya Cezaya Girane ya Anaqara de Kampusê Zîndanê Sîncanî de dest pêkerd. Demîrtaş Zîndanê Tîpa Fyî yê Edîrne ra bi rayîrê Sîstemê Veng û Dîmenî (SEGBÎS) tewrê roniştişî bî.
Avukatê Demîrtaşî salona roniştişê doze de hadre bî. Parlamenterê Partîya Demokratîke ya Şaran (HDP) Mîthat Sancar, Mehmet Ruştu Tiryakî, Murat Çepnî, Zeynel Ozel, Tulay Hatimogûllari, Parlamenterê CHPyî yê Stenbolî Sezgîn Tanrikulu, rayîrberê HDPyî û temsîlkarê partîyê bînî doze taqîp kenî.
Avukatê Swêdî Per Stadîg û yê ke serê nameyê Avukatanê Sînor Nênasî ameyî, waştî tewrê roniştişî bibî, labelê bi mehneya akredît çin o nêverdayî salona roniştişî.
Demîrtaşî rê bi îdîayê ‘Propagandeya rêxistine kerd’ û ‘Pesnê sûc û sûcdar dayo’ ra 142 serrî cezaya zîndanî yena waştene. Doza ke Amed de ameybî akerdene bi mehneya ‘asayîşî’ berdî Anqara.
Taqîpkerdişê roniştişî de sînor viraştî. Rojnamegera Arti Gerçekî Derya Okatane waşte ke doze taqîp bikera, labelê destûr nêdîya aye ke dekewa salona mehkema. Okatane hedîse ra dima serê hesabê xo yê medyaya komelkî twîtterî de reaksîyon nîşanê rewşe daye. Badê hewldayîşan destûr dîya ke Okatane dekewa salona roniştişî.
Roniştiş dewam keno… ANQARA
