Pêrtag de eşkera bî ke zaf domanî maruzê îstîsmarê cînsî bîyî. Şar vera naye vejîya meydanan û waşt ke sucdarî bi hawayêkê giranî bêrê hukmkerdene
Qezaya Pêrtagî ya Dêrsimî de zaf domanê lajî yê ke serrê înan mabênê 11 û 16î de yê maruzê îstîsmarê cînsî bîyî.
Gerre ame kerdene ke kesê bi nameyê Harun Yildirimo ke Pêrtag de kompîter û telefonanê mobîlan roşeno zaf domananê lajan rê îstîsmarê cînsî kerd û nê îstîsmarî zî qeyd kerdî. Polîsan keye û cayê karî yê Harun Yildirimî de cigêrayîş kerdbi. Dima ke cigêrayîşan de dîmenê îstîsmarê domanan ameybî dîyene Harun Yildirim amebi destbendkerdene û mehkeme de amebi tepiştene. Çarçewa serebûtî de di kesê ke nameyê înan nênê zanayene zî ameyî destbendkerdene.
Şarê Pêrtagî vera serebûtê îstîsmarê domanan vejîya meydanan. Bi seyan kesî verê bînaya Şaredarîya Pêrtagî de ameyî pêser û vera îstîsmarî nêrazîbîyayîşêko pîl mojna. Cinîyan waşt ke ganî nê serebûtî bêro roşnîkerdene û sucdarî bêrê cezakerdene.
Cinîyan vat: ”Ma nêwazenê çew bêro dardekerdene la ganî cezaya girane bêra dayene. Ma nêwazenê ke 3 mengan ra dima bi ‘rewşa holîye’ ra cezaya îstîsmarkeran bêra kêmkerdene û bivejîyê teberî. Dewlete mecbur a ke domananê ma bipawa. Ma hînî nêzanenê ke ma domananê xo kamî ra bipawê. Êyê ke domanan îstîsmar kenê ganî komelî ra bêrê dûrvistene. Ganî îstîsmar nêro meşrûkerdene. Ma vatêne Dêrsim de çîyo winasên nêno kerdene. Hînî seke her cayê welatî de esto. Ma şaristanê xo de îstîsmar nêwazenê.”
Dima bi seyan cinîyî û camêrdî rayraşîyayîşêk serûber kerd. Rayraşîyayîş de bi hawayêkê nîzamî sloganê ‘Bêveng mebê’, ‘Heq, huqûq, edalet’, ‘Ma cinî yê kes nêeşkeno ma heş bikero’, ‘Cinîye, Cuye, Azadîye’ ameyî vatene. DÊRSIM
