Dima ke DYA û Îran hêrişê yewbînan kerd îdareyê Washingtonî Konseya Asayîşî ya Neteweyanê Yewbîyayeyan rê erşawit û pare kerd ke ê amade yê ke bêşertan Îran reyde pêvînayîşan bikerê
Dima ke DYA 3ê çeleyî de fermandarê Îranî Qasim Silêmanî kişt û Îran zî 8ê çeleyî de seba cewabdayîşî fuzeyî eştî di baregehanê Amerîka yê Iraqî, DYA ra eşkerayîyê seba kêmkerdişê alozîye ameyî.
Serekê DYA Donald Trumpî roja çarşemeyî bahaneya kiştişê Silêmanîyî eşkera kerde û vat ke ê do cewabê ci nêdê.
Ame parekerdene ke DYA Konseya Asayîşî ya Neteweyanê Yewbîyayeyan rê mektubêk erşawit.
Mektub bi îmzaya Temsîlkara Daîmî ya DYA ya Neteweyanê Yewbîyayeyan Kellye Craft ame erşawitene û kiştişê Silêmanîyî sey ”pawitişê meşrûyî” ame pênaskerdene.
Heman wextî de mektub de ame îfadekerdene ke seba ke Îran reyde haştîye û asayîşê mîyannetweyî zafêr nêkewê rewşêka bitehlûke yan zî alozîya Îranî pîlêr nêba DYA amade ya ke bêşertanê destpêkan Îran reyde pêvînayîşan bikera.
Hem DYA hem zî Îranî hêrişê xo çarçewa madeya 51. ya Şertê Neteweyanê Yewbîyayeyan de pawitêne. Goreyê na made eke endamanê Neteweyanê Yewbîyayeyan ra yew bibo hedef hedefê hêrişêkê çekdarî heta ke Konseya Asayîşî tedbîrê ganîyeyî bigêra wayîrê heq o ke pawitişê meşrûyî biko. DYA mektub pêşkêşê Konseya Asayîşî zî kerd.
Temsîlkarê Daîmî yê Îranî yê Neteweyanê Yewbîyayeyan Takht Ravançîyî da zanayene ke ê nêwazenê alozîye biba pîlêr. Mektub de ame vatene ke Îran nêwazeno şer xorîn bibo labelê çarçewa heqê pawitişê meşrûyî de înan cewabê leşkerî da Amerîka. Ravançîyî vat ke operasyon de zerarêk nêresa sivîlan.
Cewabê Îranî ra dima Serekê DYA Donald Trumpî û Sekreterê Pêroyî yê NATOyî Jens Stoltenbergî bi rayîrê telefonî qisey kerd. Goreyê eşkerayîyanê Qesra Sipîye Trumpî Sekreterê Pêroyî yê NATOyî ra waşt ke seba pawitişê haştîye yê Rojhelatê Mîyanênî û vergirewtişê şerî NATO ganî hîna zêdêr têbigêro.
Hetê bînî ra Washington de zî hêrişê vera Îranî ra dima demokratî wazenê ke vernîyazo ke wezîfeyanê Trumpî kêm keno pêşkêşê reydayîşî bikerê. Sereka Meclîsê Temsîlkaran Nancy Pelosî vat: ”Qesawetê ma mende yê.” Yeno pawitene ke no vernîyazê vera Trumpî roja pancşemeyî do bêro reydayene. Çime/ANF
