Aktîvîsta TJA Hayrîye Korkmaz pare kerde ke hêrişê Tirkîya yê vera elewîyan bi destê dewletê yenê kerdene û va: “Bi nê hêrişan wazenê bawerîya elewîyan çin bikerê.”
Tirkîya de polîtîkayê înkarî yê vera elewîyan dewam kenê. Bi destê AKPyî elewîyî yenê hedefkerdene û vera înan hêriş yeno kerdene. Aktîvîsta TJA Hayrîye Korkmaz şîdet û tedaya vera elewîyan ser o ANF reyde qisey kerd
Korkmaze vat: “Ma zanenê ke şîdetê vera elewîyan hetê dewlete ra yeno kerdene. Xora dewlete çend serran ra nata seba ke kulturê elewîyan, nasnameyê elewîyan çin bikera elewîyî qetil kerdî. Bi qirkerdişê Dêrsimî, Mereşî, Sêwazî, Gazî û bi nîşankerdişê beran û dêsan wazenê ke ma bitersnê, îradeyê ma bişiknê. Ma vanê ke bawerîye teng nîya unîversal a. Caverde herkes bawerîya xo biciwîyo. Ganî dewlete elewîyan ra efûyê xo biwaza û bawerîya elewîyan bigêra binê garantîyêkî.
Meletî, Îzmîr û Stenbol de keyeyê elewîyan yenê nîşankerdene. Dima zî hêrişê vera nê keyan kenê. Na rewşe eleqeyê ci bi polîtîkaya dewlete esta. Ma zanenê ke kitaban de û sîstemê perwerdeyî de wazenê ke bawerîya elewîyan çin bikerê. Her kes naye zaneno. Ma do kultur û bawerîya xo bidê ciwîyayene. Ma vera ney têkoşîn bikerê û ma naye de qerardar ê.
Tarîxî ra heta nika teda û înkarê vera elewîyan dewam keno. Awil Meletî de dest pêkerd û dima Îzmîr û Stenbol keyeyê elewîyan ameyî nîşankerdene. Merdimê elewîyê ke keyeyê înan ameyî nîşankerdene endamê partîyêke û dezgehêkî nîyê. Ame waştene ke nê merdimî bitersê û keyeyê xo biteriknê. Ma êwro zanenê ke merdimê koçberî çi ancenî. Merdimê koçberî nasname û bawerîya xo dima xo vîrî ra kenê.” AMED
