Hêzên artêşa tirk di 14’ê çileyê de li gelek gundên Licê dest bi operasyoneke berfireh kiribû. Hat zanîn ku di çarçoveya operasyonê de leşkeran 2 kes bi hinceta ‘Piştgirî dane rêxistinê’ binçav kirine
Dewleta tirk a dagirker di çarçoveya ‘Plana Çokşikandinê’ de êrîşên xwe yên li seranserî bakurê Kurdistanê bênavber didomîne. Di vê çarçoveyê de hêzên artêşa tirk di 14’ê çileyê de li gundên Mizag, Xosor, Hendiv, Xeşderê, Şaxur, Hamza û mezrayê girêdayî wan ên Licê ya Amedê bi beşdariya gelek yekîneyen leşkerî êrîşeke berfireh dabû destpêkirin.
Li gorî agahiyên ji herêmê, li herêma ku operasyon lê didome de hin dever bi helîkopteran hatine bombebarankirin. Di heman demê de çavkaniyên ji herêmê da zanîn ku leşkeran bi ser hinek gundan de girtine. Hat zanîn ku di encama serdegirtina gundan de welatiyên bi navên A.A. û V.A bi hinceta ‘Piştgirî dane rêxistinê’ hatin binçavkirin.
Çavkaniyan destnîşan kir ku êrîşa artêşa tirk a li ser herêma navborî şevê din bi dawî bûye. AMED
