Sîyasetmedarê kurdî Ahmet Turkî ard ziwan ke ê seba yewîya neteweyîye wextêkê dergî ra nata kar kenê û vat: “Ma sey partîyanê kurdan hînî neçare yê ke pîya karêkê hemparî bikerê. Ganî ma pê dormeyê erjanê yewîya neteweyîye de sîyaset bikerê.”
Komxebata Yewîya Neteweyîye ya Xebata Yewîya Kurdîstanî ya ke bi tewrbîyayîşê Kongreya Komelkî ya Demokratîke (KCD) û 8 partîyanê kurdan ameye meydan vizêr dest pêkerd. Komxebate do ewro zî dewam bikera û muneqeşayan de rewşa yewîya neteweyîye ya kurdan do bêra eşkerakerdene. Komxebate de hemsereka KCDyî Leyla Guven, hemserekê pêroyî yê DBYyî Salîha Aydenîz û Keskîn Bayindir, aktîvîstê Têgêrayîşê Cinîyan ê Azadan (TJA), sîyasetmedaro kurd Ahmet Turk, temsîlkarê DDKD, PÎA, PDK-Bakur, PDK-T, Partîya Azadîye û hemserekê HDPyî Sezaî Temellî amade bîyî.
Sîyasetmedarê kurdî Ahmet Turkî derheqê yewîya neteweyîye ya kurdan de ANF reyde qisey kerd. Qiseykerdişê Ahmet Turkî ra beşêk wina yo:
”Serran ra nata ma seba yewîya neteweyîye xebitîyenê. Ge ge ma partîyanê Başûrê Kurdîstanî reyde zî ameyî têhet. Tay partîyê ke selam zî nêdayêne yewbînan nika yenê têhet. Na rewşe hêvî dana ma û ma pê bawer ê ke na komxebate seba ameyoxî kar bikera.
Nê xebatê yewîya neteweyîye yê ke Rojawanî ra dest pêkerd zî ganî hetê şarbîyayîşî de zî aver şorê, xo biresnê şarî, bikerê ke şar wurzo payan ser. Ganî ma prosesêkê winasênî de destkewteyê xo xurt bikerê. Ganî nê wextî de ma şar reyde xebatêka cidîye bikerê.
Xora cayanê bînan de parçeyanê bînan de sîyaset û beşê cîyayî vera kurdan têgêrenê û hêrişê destkewteyanê kurdan kenê. Eke wina yo ganî şima o çax xo biresnê şarê xo. Ganî şima pêro partîyanê kurdan û erjanê kurdan verar bikerê û goreyê naye sîyasetêk bikerê.
Ma prosesê girîngî û krîtîkî ra derbaz benê, her tim dewirê wina girîngî nêkewenê destî. Ewro kurdî pêro dinya de yenê şinasnayene û rayberîye kenê. Eke nê firsendî baş nêrê ercnayene, pêro destkewteyê kurdî rastê hêrişî do bêrê. Eke nê firsendî baş bêrê ercnayene û yewîya kurdan bêra awankerdene destkewteyê hîna hîrayî do bêrê destvisnayene.” AMED
