Meclisa Jinê ya Stenbolê ya HDP’ê û Aktivîstên TJA’yê aqubeta Gulistan Doku ya ku 16 roj in windaye, pirsîn û daxwaz kirin ku demildest Gulistan bê dîtin
Partiya Demokratîk a Gelan (HDP) û Tevgera Jinên Azad (TJA) ji bo li aqubeta Gulistan Doka ya ku 16 roj in windaye bipirsin li avahiya HDP’ê ya Stenbolê civîna çapemeniyê lidar xistin. Li qada civînê pankarta bi nivîsa ‘Gulistan Doku li ku derê ye?’ hat hilgirtin. Parlamentera HDP’ê ya Rihayê û parlamenterê HDP’ê yê Stenolê Dilşat Canbaz jî beşdarî civînê bûn.
Dilşat Canbaz di civînê de axivî û wiha got: “Dêrsim ne zêde mezin e. Lê hîn Gulistan nehatiye dîtin. Îktîdarê êrîşî kesên ji bo Gulistanê çalakî lidarxiste. Em dibînin ku îktîdar çi qasî ji jinê ditirse. Heta ku Gulistan bê dîtin em ê di nava tevgerê de bin. Em wekî jin dev ji vê yekê bernadin.”
Ayşe Surucu jî diyar kir ku windabûyîna Gulistan parçeyek ji polîtîkayên şerên taybet ên li ser Dêrsimê ne.
Encama polîtîkayên bêcezabûnê
Aktîvîsta TJA’yê Besra Îşsever jî ev tişt anî ziman: “Polîtîkayên şer ên îktîdarê yên li ser xweza, çand û mirovên Dêrsimê didomin. Tundiya li ser jin û zarokan a li Dêrsimê gelekî zêde bûye. Encama polîtîkayên bêcezabûnê dibe sedema zêdebûyîna tundî, taciz, tecawizê. Lê em ê têkoşîna xwe bidomînin û ew ê piştevaniya jinê bi ser bikeve.” STENBOL
