Endamê Masaya Weşanxaneyan ê Torra Ziwan û Kulturan û Koordînatorê J&Jyî Azad Zalî îfade kerd ke xebatê ziwan û kulturî bîyî komelkî û vat: “Ma xîret bikerê ke bi eseranê rindan kurdkî aver berê û kurdkî her ca de bêro qiseykerdene.”
Endamê Masaya Weşanxaneyan ê Torra Ziwan û Kulturan û Koordînatorê J&Jyî Azad Zalî derheqê komxebata Torra Ziwan û Kulturan a ke 4-5ê çeleyî de ameye kerdene de Mezopotamya rê qisey kerd.
Zalî bale ante girîngîya xebatanê Torra Ziwan û Kulturî ser û ard ziwan ke serra 2011î ra nata reya verêne xebatêka wina bihêze yena kerdene. Zalî vat verê cû xebatê kurdkî bi nuştoxan û weşanxaneyan sînordar bîyî la nika nê xebatî benê komelkî.
Kurdistan de yew çapxaneyê ma çin o
Zalî derheqê muneqeşayan û pêşnîyazanê masaya weşanxaneyan a Torra Ziwan û Kulturan de nê zanayîşî dayî: “Mesela ma ya verêne vilakerdişê kitabanê kurdkî û kitabanê derheqê kurdan de ya. Ma nêeşkenê wina rehet kitaban bierşawê Ewropa. Masa ganî yew sîstemê vilakerdişî awan bikera. Mesela bîne zî na ya ke Kurdistan de yew çapxaneyê ma çin o. Êyê ke estî zî kitaban çap nêkenê. Seba awankerdişê çapxaneyêkî ma hewcedarê paştdayîşê dezgehan û sazgehan ê.
Do bêrê pêser û yewbînan perwerde bikerê
Seba ke warê nuştişî de yew standardîzasyon çin o ma xelêk zehmetî ancenê. Ma nika xîret kenê ke ziwanê standartî bêro awankerdene. Weqfa Mezopotamya seba naye rayberîye kena. Ma nêeşkenê zaf edîtor û redaktor zî bivînê. Wendox zî pê naye qayîl nîyo. Ma bire girewte ke xebatêka kargehî bikerê. Her weşanxane ra edîtorî û redaktorî do bêrê pêser û yewbînan perwerde bikerê.
Ma do kurdkîya akademîke wedarê û kudkîya şarî awan bikerê
Armancê ma nê yê ke ma bi eseranê rindan û bihuneran kurdkî aver berê û her ca de kurdkî bidê qiseykerdene. Hedefê ma yo bîn zî no yo ke ma do kurdkîya akademîke wedarê û kudkîya şarî awan bikerê. Bi nê hawayî ma wazenê ke waştişê şarî bîyarê ca. Eke ziwan û kultur bihêz bibê cuye û sîyaset zî do bibê bihêz. Coka ganî xebatî bêrê bihêzkerdene.” AMED
