Dima ke DAIŞijê ke hêrişê Mexmûrî kerd ameyî kiştene serê înan de zaf malzemeyî ameyî dîyene.
Cerganê DAIŞî 2ê sibate de hêrişê Kampa Multecîyan a Şehîd Rustem Cûdîyî ya Mexmûrî kerd. Cergan Koyê Qereçoxî de 3 şîwanî birîndar kerdî û her di cergî dima bi destê gerîlayanê HPGyî ra ameyî kiştene.
Warê şerî û herême de cigêrayîş ame kerdene û netîceya ci de zaf cebilxaneyî, malzemeyî û tay telefonî ameyî dîyene. Malzemeyan mîyan de çente, kincî, erzaqî û derman zî estbî.
Yelegan ser o tay nuşteyî estbî ke nîşan dayêne ke sercergan nê çîyî sey dîyarî dayî cergan. Derman û madeyê werdî yê cergan malê Tirkîya bîyî. Nêame zanayene ke cergan senî mal û dermanê Tirkîya peyda kerdî. MEXMÛR
