Duh di danê êvarê saet derdora 17.00’an de li navçeya Miksê ya Wanê aşût hatibû xwarê û mînîbus û makîneyeke kar di bin aşûtê de mabûn. Ji bo rizgarkirina welatiyên di bin aşûtê de, xebatên lêgerînê hatibûn destpêkirin. Ji welatiyên di bin aşûtê de cenazeyên 5 kesan hatibûn derxistin û 6 kes jî hatibûn rizgarkirin. Ji bo dîtina 2 welatiyên din jî tevî welatiyên herêmê, komên rizgarkirinê jî di bin aşûtê de xebatên lêgerînê dikirin.
Li gorî agahiyan, dema ku xebatên lêgerînê dihatin kirin li heman dolê aşûteke din jî hat xwarê. Têkildarî mijarê waliyê Wanê Mehmet Emîn Bîlmez agahî dan û got ku aşût bi ser xebatkarên AFAD, UMKE û komên din ên xebatên lêgerînê dimeşandin de hatiye. AFAD’ê jî da zanîn ku hejmara kesên di bûyerê de jiyana xwe ji dest dane gihişt 33 kesan. Di bûyerê de 53 kes jî birîndar bûn. Li gorî walîtiya Wanê heta niha 19 welatiyên sivîl, 8 leşker, 3 cerdevan û 3 endamên yekîneyên agirkujiyê jiyana xwe ji dest dane. Her wiha bi giştî ji duh heta niha hejmara kesên di her du aşûtan de jiyana xwe ji dest dane bû 38.
Hat zanîn ku li herêma lêgerînê şert û mercên hewa giran in û ev yek jî li ber xebatên lêgerînê astengiyeke mezin çê dike. WAN
