Hunermend Mîkaîl Aslan bi serran o ke bi kirmanckî deyîran vano û seba goştarîkerdoxan muzîkê kurdkî de cayê ci yê taybetî esto. Mîkaîl Aslanî derheqê astengîyanê verê muzîkê kurdkî de Ajansê Mezopotamya reyde qisey kerd.
Aslanî ard ziwan ke muzîkê kurdkî vera asîmîlasyonî, qedexeyan, astengan têkoşîn keno û xîret keno ke estbîyayîşê xo bipawo. Mîkaîl Aslanî îfade kerd ke hetê bînî razî sey ‘meseleya zereyî’ kurdî bi hawayêkê bêhîsgerî nêzdîyê muzîkê xo benê.
Aslanî vat: “Kokêko qedîm ê muzîkê kurdkî esto. Nê serranê peyênan de muzîkê kurdkî xo rê di xetî xêz kerdî. Xeta yewîne muzîkê şayî yo. Xeta diyîne zî muzîko polîtîk o ke nêzdîyê arabeskî yo. Muzîkê kurdkî kokê xo ra kewt dûrî. Çunke her kes derdê populerbîyayîş anceno û wazeno ke merdiman coş bikero. Nê hewtî ra muzîkê ma kewt bela. Muzîko tradîsyone bihêz o, yew wextê ci çin o. Hunermendê ma tay wextan tesîrê medya de manenê la reyna do abigêrê kesayetê xo ser.
Hunerê ma yeno astengkerdene. Coka ganî ma xîret bikerê ke xo rê cayê alternatîfî awan bikerê. Ma muracat kenê la salone nêdanê ma. Muxalîfê hunermendî yenê astengkerdene. Ma nêeşkenê Xarpêt û Çewlîg de konser bidê çunke walîtîye destûr nêdana. Wexto ke ma wazene sey ‘xo’ bibê nê astengî hîna benê zêdêr. La ma vera nê astengîyan zî do konseranê xo bidê. Şarê ma hetê huner û kulturî ra vêşan o, coka eleqeyêkê pîlî mojnenê. A girînge na ya ke ganî ma nê eleqeyê şarê xo biancê hetê rastî ser. Ganî huner cayê bêvengî de bêro kerdene.
Ge ge hunermendî zaf yenê rexnekerdene. La hunermendî zî wayîrê keyeyêk, cuyêke yê û mecbur ê ke debarê xo bikerê. Ge ge ma înan ra zaf çi pawenê. Ma paştî nêdanê hunermendanê xo. Zaf hunermendî estê ke bi serran o bi ziwanê xo muzîk kenê. Hetêkî ra kurdî estê ke tim tirkî vanê la rojêke bi kurdkî deyîrêke vanê û cade pêro şar paştî dano ci. La hetê bînî ra ma merdimanê ke bi ziwanê xo huner kenê tim rexne kenê. Ma hunermendanê xo rê bêrehm ê.” AMED
