Yekitiya Ciwanên Êzidî (YCÊ) û Yekitiya Jinên Ciwan ên Êzidî (YJCÊ) bi meşekê 22’yemîn salvegera Komploya 15’ê Sibatê ya li dijî Rêberê Gelê Kurd Abdullah Ocalan şermezar kirin.
Meş li ber avahiya YCÊ destpê kir û heta cihê dewreya perwerdeyê ya Mam Zekî Şengalî dewam kir. Gelek ciwan û welatiyên Şengalê beşdarî meşê bûn. Piştî meş gihişt dewreya perwerdeyê ya Mam Zekî li ser nave YCÊ û YJCÊ’yê daxuyanî hat xwendin
Di daxuyaniya ciwanan de ev tişt hat gotin: “Di 9’ê Cotmeha sala 1998’an komployê li dijî rêber Apo destpêkir, di 15’ê Sibata 1999’an bi dîlgirtina Rêber Apo gihişt asta herî jor. Komploya navneteweyî 21 sal li pey xwe hişt. Em wek ciwanên Şengalê komployê û dewletên komploger şermezar dikin. Bi dîlgirtina Rêber Apo xwestin tevahî Tevgera Azadiya Gelê Kurd û gelên Kurdistanê bifetisînin. Ev komplo ne tenê li dijî rêber Apo ye li dijî hemû gelên azadîxwaz e.
Bi dîlgirtina Rêber Apo komploger negihiştin armanca xwe. Bi berxwedana gerîla û Rêber Apo komplo vala hat derxistin. Dewletên ku destê wan di komployê de hebû xwestin gelê kurd bê Serok bihêlin lê di nava van 21 salan de hate nîşandan ku gel û serokatî ji hev qut nabin.
Em wek ciwanên êzidî dibêjin; dewleta zilmakar û dagirker, heya ciwanên Apocî hebin dê negihêjin armanca xwe. Em di dawiyê de bang li hemû cîhanê dikin ku em êzidî naxwazin bi komployê bijîn. Lê heya Rêbertî azad bibe dê têkoşîna me dewam bike.” ŞENGAL
