Rojnamevan Azîz Orûç ku di 11’ê kanûna 2019’an de hat binçavkirin û paşê hat girtin, di 5’ê sibatê de malbata wî çû Girtîgeha Tîpa L a Panosê û hevdîtin pê re çê kir. Orûç di hevdîtinê de binpêkirinên mafan ên li girtîgehê ragihandiye. Orûç silav ji hevpîşeyên xwe û rêxistinên pîşeyî re şandiye û xwestiye piştgirî û piştevaniya ji bo wî dewam bike. Her wiha Orûç gotiye tenduristiya wî û moralê wî jî baş e.
Orûç destnîşan kiriye ku nameyên ji wan re tên nadin wan û nameyên ku ew dişînin jî carinan ji ber peyvekê nayên şandin û wiha gotiye: “Heta niha nameyek jî negihaye destê me. Wisa xuyaye nameyên ku ez jî dişînim nayên şandin. Bi taybetî jî ji ber ku rojnameger im naxwazin pêwendiyê bi derve re deynim. Ji roja hatime girtin heta niha pirtûk û kincan nadin min.”
Orûç destnîşan kiriye ku wekî gelek girtîgehan li Girtîgeha Panosê jî xur ketiye canê girtiyan, ev yek dibe ku ji ber avê an jî tiştekî din pêk tê û her wiha ji bo binpêkirinên mafan ên li girtîgehê û rewşa tenduristiyê gazî raya giştî kiriye. AMED
