Merkezê Xeberan]
Qezaya Sarayî ya Wanî de 4ê sibate vewrês ginabi mînîbusêke û wesayîtêkê karî ser. Hedîse de 5 kesî merdbi, 6 kesî birîndar bibî û 2 kesî zî binê vewre de mendbi. 5ê sibate de wexto ke tîmê xelisnayîşî û hemwelatijî cigêrayîşê xelisnayîşî kerdêne vewrêso diyîne ginabi înan ser. Vewrêso diyîne de cenazeyê 41 kesan binê vewre ra ameyî vetene. Xebatkarê adirhewnakerdişî Mehmetcan Taşdemîrî hema zî binê vewre de yo. Ekîbê xelisnayîşî seba vînayîşê Taşdemîrî xebatanê xo domnenî. Ekîbî xelisnayîşî xo resnayî heta dewa Yukari Narlica. Labelê şertê hewayî vera 7ê sibate de maben dîya xebatanê xelisnayîşî.
Eşkerayîya Walîtîya Wanî
Walîtîya Wanî derheqê babete de eşkerayî daye û daye zanayene ke ekîbê xelisnayîşî xebatanê xo yê seba vînayîşê Mehmetcan Taşdemîrî domnenî.
13 penaberî hema zî binê hewre de yî
Heto bîn de dewa Navrî ya pabesteyê qezaya Ebezî ya Wanî de serê sînorê Îranî de 10ê ci penaberê Afganistanî û 3ê ci penaberê Kobanê pêropîya 13 penaberî serd û seqemo şîdetin vera qerisîyabî û cuya xo vindî kerdbî. Ame zanayene ke badê ercnayîş û tespîtkerdişê cendirmeyan yê herême do ekîbê xelisnayîşî sewqê herême bêrî kerdene.
