Li navçeya Esenyûrt a Stenbolê, polîsan di saetên şevê de bi ser mala hevserokê berê ye Partiya Demokratîk a Gelan (HDP) yê naçeyê de girtin. Polîsên ku ketin malê, destpêkê li Karçik, biraziyê Karçik û kekê wî yê nexweşê pênceşerê xistin. Polîsan piştî kontrola nasnameyê ji wan re gotin “Îxbarek şaş hatiye kirin, bi şaşî ketine adresê” û ji mala Karçik veqetiyan.
Karçik ku ji ber lêdana polîsan ji dest, ling û rûyê xwe birîndar bû, rakirin Nexweşxaneya Dewletê ya Esenyûrtê. Birazî û kekê wî jî rakirin Nexweşxaneya Dewletê ya Kanûnî Sûltan Suleyman.
Karçik diyar kir ku polîsan bi zanebûn avêtine ser mala wan û wiha axivî: “Em ê vê mijarê bişopînin û giliyê polîsan bikin. Ne îxbareke şaş bû, bi zanebûn hatin li me dan û çûn. Ev polîtîkayeke zext û tepisandinê ye. Encama vê, desthilatdarî û zîhniyeta heyî ye.”
Her wiha Karçik derbarê bûyerê de ev agahî da: “Saet derdora 22:00, 23:00 bû. Polîsan ji nişka ve avêtin ser mala me. Piştî ku li biraziyê min dan, ji nişka ve deng hat min. Wê demê min li şaneşînê çixare vedixwar. Dema ku min ji wan re got ‘Kekê min nexweş e, hûn çima li biraziyê min dixin?’ Ez jî avêtim erdê, ez bi erdê re kaş kirim û daxistin xwarê. Li ser û rûyê min û lingên min xistin. Nasnameyên me birin. Piştre gotin ‘îxbar şaş e’ û çûn.” STENBOL
