Partiya Demokratîk a Gelan (HDP) li Navenda Çandê ya Hasan Alî Yucel a li Navçeya Kartala Stenbolê Şeva Dengbêjan li dar xist. Meclisa Dayikên Aştiyê, Tevgera Jinên Azad (TJA), Kongreya Civaka Demokratîk (KCD), Meclisa Ciwanan a HDP’ê, MEYA-DER, ANYAKA-DER, Rêxistina CHP’ê ya Kartalê, Partiya Sosyalîst a Bindestan (ESP), gelek komeleyên wekî din, Hevserokê HDP’ê yê Stenbolê Erdal Avci beşdarî Şeva Dengbêjan bûn.
Endama Meclisa Jinên Ciwan a HDP’ê Delal Şeker axaftina destpêkê kir û wiha got: “Çanda kurd bi saya dengbêjiyê heta roja îro hatiye. Dengbêjî deng zindî dike. Dengbêj tiştên ku gel jiyaye tîne ziman. Carinan evînê, carinan xwezayê, gelek carî jî lehengî û îxanetê tîne ziman. Dengbêj nahêle çîrokên gel winda bibe. Dengbêj hafizaya gel e.”
‘Dê tu zext nikaribe çanda gelan têk bibe’
Piştre Erdal Avci axivî û ev tişt anî ziman: “Gelên li Mezopotamyayê ji bo hebûna xwe îspat bikin bi salan bedelên mezin dan. Ew ê tu zext nikaribe çanda gelan têk bibe. Ji bo em bên vê astê ev 40 sal e em bedelên giran didin. Ji bo ev mîrateya bigihêje nifşên din em ê têkoşîna xwe bidomînin.”
Piştî axaftinan Nezîr Agit, Xalide, Kazo, Alîcan Bîlgîn, Hozan Baran, Vechettîn û Arîf Xelatî derketin ser dikê. Gel eleqeyek baş nîşanî kilamên dengbêjan da. STENBOL
