Avûkatanê Buroyê Huqûqî yê Asrinî derheqê tecrîdê vera Rayberê PKKyî Abdullah Ocalanî, Omer Hayrî Konarî, Hamîlî Yildirimî û Veysî aktaşî de ke Zîndanê Îmraliyî de tepişte yê muracatê Komîteya Teqîbkerdiş û Vergirewtişê Îşkenceyî ya Konseya Ewropa (CPT) kerd. Muracat de binpaykerdişê heqanê merdiman yew bi yew ameyî rêzkerdene.
Goreyê xebera Ajansê Mezopotamya avûkatan muracatê xo de eşkera kerd ke înan 27ê temmuza 2011î ra heta 2ê gulana 2019î nêeşkîyayî muwekîlanê xo reyde pêvînayîş bikerê û 7ê temmuza 2019î ra dima zî xeylêk muracatî ameyî kerdene la pêro zî red bîyî. Avûkatan muracatê xo de vat ke 3 menganê peyênan ê serra 2019î de her rey 4 avûkatan muracat kerd û bi temamî 108 muracatê pêvînayîşî bêcewan mendî. Muracat de ame vatene: ”Goreyê qanûnî heqê her pêvînayoxî esto ke 469 saetan pêvînayîş bikerê la no heq nêame caardene. 3 menganê peyênan ê serra 2019î de keyeyan 65 reyî muracat kerd labelê pêvînayîş nêame kerdene. Goreyê qanûnî rojanê taybetan de zî heqê tepişteyan esto ke 8 saetan pêvînayîş bikero la no heq zî nêame dayene.”
Cezayê keyfîyî ameyî dayene
Muracat de ame vatene: ”Ame eşkerakerdene ke seba pêvînayîşê Ocalanî û wasîyê ey cezaya dîsîplînî asteng nîya labelê dozgerîye muracatê asîyî pêro red kerdî. Birêz Hamîlî Yildirim, Omer Hayrî Konar û Veysî Aktaş adara 2015î de sewqê Zindanê Îmraliyî bîyî labelê 4 serr û 9 mengan ra nata avûkatê înan nêeşkenê înan reyde pêvînayîş bikerê.”
Rapor de ame mojnayene je 3 mengan de 5 reyî bi hawayêkê keyfîyî tepişteyan rê ceza ameye dayene.
‘Têkilîya înan a bi teberî ameye astengkerdene’
Muracat de dayîya zanayene ke têkilîya Ocalanî û her hîrê tepişteyan a bi dinya bi temamî ameye astengkerdene û wina ame vatene: ”Heqê verênî yê muwekîlê ma ameyî binpaykerdene. Muracatê huqûqîyî û dîyalogî ameyî atsengkerdene. Çîyê ke yenê kerdene vera qedexeyê îşkenceyî yê. Qedexeyê hukmî yê keyfî, qedexeyê îdarî yê keyfî wina yê ke ganî nêrê peygoşkerdene. Ganî şert û mercî goreyê serra înan, rewşa înan a weşîye bibîyêne labelê tepişteyan rê asta îşkenceyî de yenê têgêrayene.”
Wa CPT raporê xo eşkera bikero
Avûkatan muracatê xo de bale ante pêşnîyazanê raporê CPTyî yê derheqê Îmraliyî de ser û vat ke 3 meganê peyênan de nê pêşnîyazî nêameyî caardene. CPTyî serra 2016î de Îmrali zîyaret kerdbi û tay binpaykerdişê heqan tesbît kerdbi. Avûkatan pare kerd ke derheqê nê binpaykerdişan de gamêke nêameye eştene.
Peynîya muracatî de avûkatan waşt ke binpaykerdişê heqan bêrê wedaritene û prosesê teqîbî bêro destpêkerdene. Muracat de wina ame vatene: ”Komîteya şima 6-17ê gulana 2019î de zî şîye Zîndanê Îmraliyî û tay tesbîtî kerdî. Ma wazenê ke nê tesbîtî û pêşnîyazî bêrê eşkerakerdene.” STENBOL
