Yekemîn danişîna doza darizandina E.B ê girtî yê li Wanê destdirêjî zarokekê kiribû hat dîtin. Zaroka rastî destdirêjiyê hat di dadgehê de girî. Parêzerê ku ev yek îtîraz kir ji dadgehê hat derxistin
Yekemîn danişîna doza darizandina E.B ê girtî yê di marketa xwe ya li navçeya Rêya Armûşê ya Wanê di meha Tîrmehê de destdirêjî zaroka 9 salî kir, hat dîtin. Danişîn li 1’emîn Dadgeha Cezayê Giran a Wanê hat dîtin. E.B ê bi sûcdariya “Îstîsmara zayendî ya zarok” tê darizandin, bi SEGBÎS’ê ji Girtîgeha Tîpa L a Patnosê beşdarî danişînê bû. Parêzer û malbata zaroka 9 salî beşdarî danişînê bûn. Endamên Komîsyona Zarokan a Baroya Wanê û aktîvîstên Tevgera Jinên Azad (TJA) danişîn şopandin.
Parêzer ji salona danişînê hat derxistin
Danişîn piştî tespîta nasnameyê dest pê kir. Zaroka ku bi SEGBÎS’ê beşdarî danişînê bû, bi navbeynkariya pedagog tiştên jiyan vegotin û di dema vegotinê de giriya. Parêzera endama Komîsyona Zarokan a Baroya Wanê, îtîrazî vê rewşê kir, lê dadgehê parêzer ji salona danişînê derxist.
Bersûc xwe bi AKP’ê parast
Bersûc E.B. ê bi SEGBÎS’ê beşdarî danişînê bû jî, di parastina xwe de wiha got: “Ez AKP’î me. Li dijî min komplo kirin. Ez rastî bêbextiyê hatim.”
‘Ez dest ji dozê bernedim’
Dûre dayika zaroka 9 salî O.L. mafê axaftinê girt û wiha got: “Ez gilîdarê E.B. me. Ez dest ji doza xwe bernadim.” Piştî şahid hatin guhdarkirin.
Dadgehê piştî guhdarkirina şahidan navber da danişînê. Dadgehê dûre biryar da ku girtina bersûc dewam bike û danişîn taloqî 21’ê Nîsanê kir. WAN
