Avûkatanê Buroyê Huqûqî yê Asrinî derheqê şewatê daristanî yê Girawa Îmraliyî ke Rayberê PKKyî Abdullah Ocalan tede yo de eşkerayîyêke daye.
Eşkerayîya buroyî wina ya:
”Xebera ke vana tarîxê 27.02.2020î de Girawa Îmraliyî de şewat vejîy warê çapemenîye de ca girewt. 7ê tebaxa 2019î ra nata muracatê ma yê seba pêvînayîşê muwekîlanê ma yenê red kerdene û ma muwekîlanê xo ra ke Girawa Îmraliyî de yê xeberêke nêgênê. Coka ma derheqê şewatî de zanayîşê ma çin o û ma xebere bi rayîrê çapemenîye musayî. Seba ke ma rewşa muwekîlanê xo û şert û rewşa zîndanî bizanê û qesawetê ma pûç bibê ma muracatê Serdozgerîya Komare ya Burda û Wezaretê Edaletî kerd. Ma proses nêzdî ra teqîb kenê. Ma reyna vanê ke mîyanê şert û mercanê tecrîdî de ganî her kes bi hawayêkê cîdîyî nêzdîyê mesele bibo û ma venga rayaumûmîye danê ke wa hîsger biba.”
