Merkezê Cigêrayîşanê Dêrsimî (DAM) Otêla Taksîm Hillî de bi serrnameyê ”Dêrsimo ke Xorasan de yo, Xorasano ke Dêrsim de yo” panelêk serûber kerd. Nuştox Selîm Temo sey panelîst tewrê panelî bi û panel hetê hemwelatîyan ra eleqeyêko pîl dî.
Îdarekarê DAMî Huseyîn Ayrilmazî destpêkê panelî de qisey kerd û ard ziwan ke ê derheqê tarîxê Dêrsimî de bi hawayêkê nîzamî xebatan, aktîvîteyan kenê û bi naye armanc kenê ke rastîyan biresnê komelî. Ayrilmazî bale ante ser ke wextanê peyênan de yeno xîret kerdene ke tarîx û kulturê Dêrsimî bêrê vurnayene. Ayrilmazî vat ke ganî vera naye tebdîrî bêrê girewtene.
”Di parçe yê ke yewbînan ra cîya nêbenê”
Dima nuştox Selîm Temoyî dest pê pêşkêşê xo kerd û Temoyî qala têkilîya mabênê Dêrsimî û Xorasanî kerde. Temoyî bi hawayêkê xurtî ard ziwan ke Xorasan û Dêrsim di parçe yê ke yewbînan ra cîya nêbenê. Temoyî derheqê muzîk û şîîranê di wareyan de pêşkêşî kerdî. Temoyî eşkera kerd ke netîceya hêrişanê vera Dêsimî kurdanê Dêrsimî koçê Xorasanî kerd.
Temoyî da zanayene ke rîxmê nê herişan zî estbîyayîşê kurdan her di wareyan de zî bi hawayêkê pîtî dewam keno û bi xîretanê asta federasyonî konfederasyonî kurdî vera asîmîlasyonî û înkarî xo ver danê.
Panel bi beşê pers û cewaban qedîya. STENBOL
