Navenda Nûçeyan |
Li bajarê Wuhan ê Çînê coronavîrûs derketibû û ev vîrûs roj bi roj li dewletên cuda belavtir dibe. Ji welatên cuda heta niha li dehhezaran kesan teşhîsa coronavîrûsê hatiye danîn û hejmara kesên ji ber vê vîrûsê jiyana xwe ji dest didin jî zêdetir dibe. Li gorî agahiyan, li Çînê 42 welatiyên din ji ber vê vîrûsê jiyana xwe ji dest dan. Bi vê yekê re li temamiya cîhanê hejmara kesên ji ber coronavîrûsê jiyana xwe ji dest dane 3 hezar derbas kir.
Ji sedî 90 kesên jiyana xwe ji dest dane, ji herêma Hubeî ya Çînê ne ku ji ewil vîrûs li wir hatibû dîtin. Li gel Çînê, heta niha zêdetirî 50 kes li Îranê û 30 kes jî li Îtalyayê ji ber vê vîrûsê jiyana xwe ji dest dane. Her wiha li 10 welatên din jî coronavîrûs bû sedema mirina mirovan. Li temamiya cîhanê heta niha herî kêm di 90 hezar kesan de teşhîsa coronavîrûsê hatiye dayîn.
Têkildarî mijarê Rêxistina Tenduristiyê ya Cîhanê (WHO) da zanîn ku di gelek nexweşan de vexuyangên sivik hatine dîtin û ji sedî 2 heta 5’an kesên bi vê vîrûsê ketin jiyana xwe ji dest dane. WHO’yê asta gef û metirsiyê derxist qonaxa herî bilind û welatên vîrûs hîn lê dernebûne hişyar kir. WHO’yê got: “Şaş e ku mirov xwe bi ewle bibîne.”
