Navenda Nûçeyan |
Navenda Ragihandin û Çapemeniyê ya Hêzên Sûriyeya Demokratîk (HSD) têkildarî îdiayên artêşa tirk ku di gotin; ’32 şervanên YPG’ê dema ku amadekariya êrîşê dikirin ji hêla hêzên me ve hatine kuştin’ daxuyaniyeke nivîskî bi raya giştî re parve kir.
Di daxuyaniyê de HSD’ê îdia derewandin û ev agahî bi raya giştî re parve kirin: “Di daxuyaniya Wezareta Parastinê ya Tirk a dagirker de hate îdîakirin ku ’32 şervanên YPG’ê yên amadekariya êrîşê dikirin hatine kuştin.’ Gotinên di daxuyaniyê de hatine kirin ji rastiyê dûr in. Ev gotin di çarçoveya şerê taybet de tên kirin.”
Hêjayî gotinê ye ku dewleta tirk ji bo ku windahiyên xwe yên li Idlibê veşêre, serî li rê û rêbazên cuda dide. Di vê çarçoveyê de li hêlekê hejmara kuştî û birîndarên rejîma Sûriyeyê pir zêde û yên xwe jî pir kêm nîşan dide. Li hêla din jî hewl dide bi îdiayên ku ‘şervanên HSD û YPG’ê kuştine’ pêşî li bertekên gel bigire.
