Navenda Nûçeyan |
Hêzên Rizgariya Efrînê (HRE) bi daxuyaniyekê ragihand ku hêzên wan di navbera 4 û 7’ê adarê de li dijî hêzên dagirker ên artêşa tirk û çeteyên wê li Efrîn û herêmên derdora wê çalakiyên bibandor pêk anîn.
HRE’yê da zanîn ku çeteyên dagirker di 4’ê adarê de xwestin êrîşî bajarokê Şêx Îsa bikin û li ser bersivdayîna hêzên wan, çete paşve reviyan. HRE’yê diyar kir ku hejmara kuştî û birîndarên çeteyan nehat zelalkirin. HRE’yê destnîşan kir ku di 5’ê adarê de jî hêzên wan li dijî baregeha artêşa tirk a li Ezazê çalakiyeke taybet pêk anî û wiha dom kir: “Di çalakiyê de tankek hate rûxandin lê hejmara kuştî û birîndaran nehat zelalkirin.”
Têkildarî çalakiyên din jî HRE’yê ev agahî dan: “Hêzên me di 6’ê adarê de jî li Efrînê li dijî çeteyan çalakiya sabotajê pêk anî. Di çalakiyê de 2 çete birîndar bûn. Her wiha di heman rojê de li Ezazê jî 2 seyareyên çeteyan hatin şewitandin. Di 7’ê adarê de jî hêzên me li gundê Birc Heyder ê Şêrawayê çalakî pêk anî. Di çalakiyê de 2 çete hatin kuştin, çeteyek birîndar bû û seyareyek jî hate rûxandin. Li xeta Babê jî hêzên me 2 çalakiyên sekvaniyê pêk anîn. Di çalakiyan de çeteyek hate kuştin û yek jî birîndar bû.”
HRE’yê herî dawî jî ragihand ku artêşa tirk û çeteyên wê di demên dawî de gundên Şera, Şêrawa û Şehbayê bê navber topbaran dikin.
