Çewlîg de binê berzîya bi 2 hezar û 500 rakiman ê Koyê Hesarekî de Merkezê Xijî yê Hesarekî esto ke şar zaf eleqe mojneno ci. Merkezê Xijî merkezê şaristanî ra bi 34 kîlometreyan dûrî yo û tede seba domanan, profesyonelan û amatoran 5 pîstê xijî estê. Merkez de teleskî û teleferîk zî estê. Resayîşê seba merkezê xijî bi mînîbusan û wesayîtê şexsîyî yeno kerdene. Goreyê varayîşê vewre merkez aşma teşrîna verêne de abeno û heta aşma adare akerde yo.
Heskerdoxê xijî rayîrê merkezî de pê xozayê Çewlîgî mest benê. Bi seyan hemwelatîyê Amed, Xarpêt, Êlih û Meletî zî her serre yenê benê meymanê xozayê Çewlîgî û xo xij kenê. Derheqê babete de hemwelatîyê ke cayanê cîya-cîyayan ra seba vînayîşê rindîya xozayê Çewlîgî ameyî qisey kerdî.
Heta ke sezonê xijî nêqedo
Hemwelatîyan ra Alî Yilmazo (50) ke ame merkezê xijî îfade kerd ke ey tim waştêne ke xo xij bikero, la heta nika firsend nêdî. Yilmazî ard ziwan ke heta ke sezonê xijî nêqedo o do xijkerdiş bimuso.
Serê Koyê Hesarekî
Bêrîtane Ozera ke qisey kerde zî Çewlîg de wendekar a. Bêrîtane ard ziwan ke seba ke stresî ra bixelisa yena xo xij kena û va: “Ez tîya de pê hewayê pakî kêf kena û xo xij kena. Ez pê teleferîkî vejîyena serê Koyê Hesarekî û uca ra ewnîyena dîmenanê bêhempayan.”
Ramazan Peksuyî qalîkerdişê xo de ard ziwan ke Amed de vewre zaf zêde nêvarena û coka ra ame Hesarek ke xo xij bikero û kêfê demserrî bivejîno.
Rozerîne Yakut zî vat ke a reya verêne ameye merkezê xijî û tira zaf hes kerd.
Hemwelatîyî Mehmet Subaşiyî zî vat: ”Ez seba ke xozayê Çewlîgî bivîna ameya tîya. Êyê ke dibistan û karî ra ecîz bîyî ganî bêrê tîya.”
Pîstan de xijî ra dima tay çalî yenê meydan. Nê çalî her roje hetê personelan ra yenê duzkerdene û dêkerdene. ÇEWLÎG
