Goreyê doneyanê Dezgehê Îstatîstîkany ê Tirkîya (TUÎK) nufusê Dêrsimî yo ke serra 1990yan ra verî 133 hezar û 140 kesî bi, nika bi 84 hezar 660 kesî. Parlementerê Partîya Demokratîke ya Şaran (HDP) yê Dêrsimî Alîcan Onluyî derheqê babete de vernîyazê persî da Meclîsî ke Hetkarê Serekkomarî Fuat Oktay cewab bido ci.
Onluyî bale ante ser ke goreyê nê doneyanê TUÎKî hûmara wekîlanê Dêrsimî ameye kêmkerdene. Wekîl Alîcan Onluyî vat: ”Bi Terteleyê 38î, polîtîkayanê îskanî, vengkerdişê dewan, qedexeyanê ware û merayan, polîtîkaya 1990an ame waştene ke Dêrsim bêmerdim bimano. Nê polîtîkayî hetêkî ra ser kewtî. Nê polîtîkayî ewro zî dewam kenê. Dêrsim de leşkerî ameyî cadayene, kultur û bawerîya Dêrsimî yenê çinkerdene, Dêrsim bi HESan û ocaxê madenan yeno talankerdene. Şarê Dêrsimî ra hetê ekonomîkî ra hetkarîya butçeyî nêna kerdene. Tewr peynî de zî hûmara wekîlanê Dêrsimî ameye kêmkerdene ke îradeyê ci bêro şiknayene.”
Onluyî nê persî Fuat Oktayî ra persayî:
-Şarê Dêrsimî çira koç kerd? Bi waştişê xo koç kerd yan zî neçare mend?
-Semedê nê koçkerdişan çî yê?
-Vera nê koçkerdişan çi tebdîrî yenê girewtene, çi xebate yena kerdene?
-Kêmkerdişê hûmara wekîlan destsernayîşê îradeyî nîyo? ANQARA
