Vîrusê Korona (Kovîd-19) ke 12ê kanûna 2019î de bajarê Çînî yê Wuhanî ra vejîya raşte bi lezûbez vilayê pêroyê dinya beno. Wezîrê Weşî Fahrettîn Koca derheqê vilabîyayîşê Vîrusê Korona de saetanê şewe de eşkerayîyêke dabî. Eşkerayî de ame dîyarkerdene ke Vîrusê Korona Tirkîya de zî ameyo vînayene. Heto bîn de Wezîrê Weşî Koca da zanayene ke heta emrêko diyîn destûrê serranê yê heme personelanê weşîye ameyo betalkerdene.
Wezîrê Weşî eşkerayîya xo de va: “Vîrusê Korona vera destûrê serrane yê heme personelanê ma yê weşîye heta emrêko diyîne ameyo betalkerdene. Sebebê herînayîşê destûranê serrane ferq nêkeno. Destûrê zewac, merg, destûrê dayîkî û destûrê ke kewenî çareweya maddeyê 105ine nêameyî betalkerdene. Ganî heme personelê hessan têbigêrî.” ANQARA
