Kongreya Komela Demokratîke (KCD) ewro bi wesîleya serrgêra 32. ya Qirkerdişê Helebçe eşkerayîyêka nuştekîye daye û bale ante qirkerdişanê vera şarê kurdî ser.
Eşkerayîya KCDyî de wina ame vatene: “Qirkeridşê Helebçe yo ke şexsê şarê kurdî de vera pêro merdimîye ame kerdene sey sucêkê merdimîye tarîx de ca girewt. Qirkerdişê Helebçe de ke dîktatorîya Saddam Huseyînî de ame kerdene 5 hezar kurdî ameyî qetilkerdene. Her çiqas Qirkerdişê Helebçe ra 30 serrî vîyartî zî birînê ci nêvîyart û no qirkerdiş bi kerdişanê qirkerdişî yê Efrînî xorinêr beno. Na stratejîya qirkerdişî Qoçgîrî, Agirî, Zîlan, Dêrsim, Maraş, Qamişlo, Roboskî, Şengal, Cizîre, Nisêbîn, Sîlopî, Şirnex û xeylêk şaristananê Kurdîstanî de bi qirkerdişanê pîlan dewam kerd. Şarê kurdî pêro tarîxê xo de vera nê qirkerdişan gamêke apey nêeşte û teslîmîyet qebul nêkerd.”
KCDyî peynîya eşkerayîye de venga rêxistinanê sivîlan, şarê kurdî, partîyanê kurdan da ke bi hawayêkê lezî yewîya neteweyîye bîyarê ca. AMED
