Serekê Baroyê Çewlîgî Hanîfî Budancamanakî pare kerd ke verî ra nata meseleya bêxoserîya hukmkerdişî esta la na mesele serranê peyênan de zêdîyaye.
Budancamanakî ard ziwan ke îqtîdar vera tay biranê hukmkerdişî sey waştişan eşkerayîyan dano. Budancamanakî eşkera kerd ke îqtîdara tedaya hukmkerdişî keno û mehkemeyê ke goreyê waştişanê îqtîdarî tênêgêranê bêtesîr keno.
Serekê Baroyê Çewlîgî Hanîfî Budancamanakî vist vîrî ke ganî îqtîdarî binê serdestîya hukmkerdişî de bibê û vat: ” Nê wextanê peyênan de bi zor û waştişê îqtîdarî kerdişê bêhuqûqî yenê kerdene. Hukm xoser o. Kesêk nêeşkeno ferman bido ci. No sucêkê qanûnê bingeyî yo ke pê vatişê îqtîdarî bire bêra dayene yan zî bêro têgêrayene.”
Budancamanakî da zanayene ke ganî kam beno wa bibo her kes goreyê bingeyanê huqûqî têbigêro û ê heta ke şertê dewleta huqûqî bêrê awankerdene ê do têkoşînê xo rê dewam bikerê. ÇEWLÎG
