Navenda Nûçeyan |
Ji ber şewba vîrûsa koronayê pakêta darazê ya birêkûpêkirina yasaya înfazê tê amadekirin. Tê xwestin ku girtiyên siyasî derveyî vê pakêtê werin hiştin. Parlamenterê Partiya Demokratîk a Gelan (HDP) ê Kocaeliyê Omer Farûk Gergerlîoglu li dijî belavbûna şewba vîrûsê bêyî ku cudakariyê bixin navbera girtiyan, ji bo hemû girtî werin berdan kampanyaya îmzeyan da destpêkirin.
Kampanya bi sernavê ‘Di pakêtê darazê de cih ji cudakariyê re nîne – Ji bo girtiyê siyasî jî wekhevî’ hat destpêkirin û di nava sê rojan de hejmara îmzeyan nêzî 55 hezaran bû. Kampanya bi lez û bez berbelav dibe û kampanya bi zimanê tirkî, inglîzî û almanî tê birêvebirin.
Di nivîsa kampanyaya îmzeyan de tê gotin ku niha bi ser 50 hezar kesî re rojnameger, nivîskar, siyasetmedar, hunermend, akademîsyen, parêzvanên mafê mirovan, mamoste, bijîşk, parêzer, xwendekarên zanîngehê, karsaz, jin û dayik ji ber fikr û ramanên xwe bi îdiaya ‘terorê’ di girtîgehan de ne. Di nivîsê de tê xwestin di çarçoveya vê pakêtê de hemû kes demildest divê werin berdan.
Kampanya li ser Change.org tê birêvebirin û didome.
