Hukmato ke vera janê Korona semedê zîndanan tedbîrêko zixm nêgêno çareserîye qedexekerdişê pêvînayîşî de vîneno. Wezîrîya Edaletî ya Tirkîya qedexeyê pêvînayîşanê zîndanan o ke sey ‘tedbîrî’ amebi girewtene seba 2 hewteyanê bînan derg kerd.
Bi qerarê Wezîrîya Edaletî akerde û qefilnaye pêvînayîşê avûkatan zî tede heme pêvînayîşî seba 2 hewteyan ameyî qedexekerdene. Teberê heqê îzînê taybetî, nêweşîye û asayîşî yê înanê ke dezgehanê înfaze ceza yê akerdeyan de manenê naqlkerdişî zî tede heme falîyetî seba 2 hewteyan ameyî taloqkerdene. Reyna domanê ke pa mayanê xo zîndanî de manênê ê zî seba di hewteyan do mevejê teber. Merdimê tepişteyan rewşa îstîsnaye de do bi qerarê serdozgerîye pêvînayîş bikerê. Avûkatî zî rewşa îstîsnaye de do bi lapik û maskeyan pêvînayîşo qefilnaye bikerê.
