Federasyona Komeleyên Hiqûqî û Piştevaniyê ya Malbatên Girtî û Hikûmxwaran a Medê (MED TUHAD-FED) der barê girtiyên siyasî ku li derveyî înfaza cezayê ya ji ber vîrûsa koronayê (Covîd-19) hatin hiştin, daxuyanî da û da zanîn ku li ser girtîgehan rîsekeke mezin heye.
MED TUHAD-FED’ê diyar kir wezareta dadê di pakêta darazê de cihêkarî kiriye. Bi domdarî jî MED TUHAD-FED’ê ev tişt parve kirin: “Li girtîgeha ji ber vîrûsa koronayê tu tevdîr nehatine girtin û ev jî talûkeyeke mezin e. Li Girtîgeha Girtî ya Tîpa D a Amedê di nava xwarinê de lepik derketine û xwarin ne li gorî şertên hijyenê ne. Li Girtîgeha Tîpa T a Seydîşehîr a Konyayê li dijî vîrûsê tu tevdîr nehatine girtin û alavên paqijiyê nadin girtiyan.”
Di berdewamê de jî MED TUHAD-FED’ê balkişand ser girtîgehên din û ev agahî dan: “Li Girtîgeha Girtî ya Şakranê sabûnê jî nadin girtiyan. Girtiyê bi navê Mûstafa Geylanî ku li Girtîgeha Jimar 2 a Bi Ewlehiya Bilind a Xarpêtê dimîne lê ji bo dadgehê niha anîne Girtîgeha Tîpa E’yê, di hucreya yekkesî de tê hiştin û alavên paqijiyê nadinê. Li Girtîgeha Girtî ya Tîpa M a Baybûrtê tevî giliya girtî û hikûmxwaran a kuxik û şewitîna qirikê jî, testa wan nayê kirin, girtîgeh nayê dezenfektekirin. Li Girtîgeha Girtî ya Tîpa M a Êlihê jî girtiyan li dijî newekheviya înfazê, şewat derxistin.”
Bang kir
Herî dawî jî MED TUHAD-FED’ê di serî de wezareta dadê, bang li saziyên têkildar ên dewletê kir ku tevdîrên lezgîn bigirin û pirsgirêkên girtîgehan çareser bikin. MED TUHAD-FED’ê ji malbatên girtiyan û derdorên demokratîk jî xwest ku bihestiyarî tevbigerin û ji bo qanûna înfazê bi rengekî wekhev û adilane pêk bê jî dengê xwe bilind bikin. AMED
