Qayûmê Êlihî verê cû sîteyê înternetî yê Şaredarîya Êlihî ra beşê kurdkî wedaritbi û nêrazîbîyayîşan ra dima zî gamêka apey eştbî. Qayûmê Êlihî na reye zî xebatkarê şaredarîye ziwannas, nuştox û açarnayox Zana Farqinî û di kesê bînî karî ra vetî. Zana Farqinîyo ke semedê vîrusê Korona ra îzîn de bi, 3ê nîsane de bire ci rê ameye erşawitene. Farqinîyî rewşe sey darbêka pîle ya vera huber, ziwan û kulturê kurdan ercnaye.
Zana Farqinîyo ke seba xebatanê xo yê ziwanî şaredarîye de dest pê karî kerd da zanayene ke 1ê nîsane de karî ra ame vetene û bire 3ê nîsane de ci rê ameye erşawitene. Farqinîyî eşkera kerd ke ey reyde di kesê bînî zî karî ra ameyî vetene û vat: ”Ez wexto ke îzîn de bîya karî ra ameya vetene. La nê detayê girîngî nîyê. Oyo girîng ziwanê kurdkî yo û girîng o ke gelo şaredarîye xebatanê ziwanî dewam bikera yan ney. Ma do seba domanan û derheqê folklorê kurdan xebatî bikerdêne. Ma seba perwerdeyê mamostayanê kurdkî dest pê xebate kerdbi ke şaredarîye de kursê kurdkî abikerê. Ma sey amadekarîya ferhengê kurdkî zî projeyêk kerdêne. Bi nê hawayî hêverî pêro ferhengê kurdkî bo bibîyêne dîjîtal.
Hêverî kurdkî sîte ra ameye wedaritene dima zî kesê sey mi karî ra ameyî vetene. Nê pêro mojnenê ke şaredarîye de hînî xebatê seba kurdkî nênê dewamkerdene. Nîyetê înan çin o eleqe bimojnê ziwan, kultur û nasnameyê kurdan. ”
Zana Farqinîyî bale ante ser ke nê prosesê vîrusê Korona de merdimî tengasîye ancenê û vat: ”Wexto ke qayûm ame tayînkerdene, înan vat ke çew karî ra nêro vetene la ma karî ra vetî. No zî nîşan dano ke ê vera ziwan û kulturê kurdan bêtehamul ê. Ez na rewşe sey darbeya vera kultur, ziwan û hunerê kurdan vînena. Ê nêwazenê ke derheqê kultur û ziwanê kurdan de xebatêke bêra kerdene û ziwan û kulturê kurdan aver şorê.” ÊLIH
