Navenda Nûçeyan |
Konseya Rêveber ya Kongreya Neteweyî ya Kurdistanê (KNK) bi wesîleya 40’emîn salvegera komkujiya li ser kurdên feylî yên li Iraqê daxuyaniyeke nivîskî weşand.
Daxuyaniya KNK’ê wiha ye:
“Ev rojên han çilemîn bîreweriya salvegera jenosîd û raguhastina kurdên Feylî ye. Berî çil salan rejîma zordar a baasê ku wê çaxê bi agir û hesin desthilatiya Êraqê dikir, xedreke mezin li kurdên feylî kir. Wê çaxê rejîma baas a erebî li Êraqê, bi şêwazên xwe yên hovane û ji hemû pîvanên mirovahiyê dûr û bi merama duristkirina duberekiya mezhebî li Êraqê hewla ji navbirina feyliyan da.
Bi hêceta ew hemwelatiyên îranî ne, qaşo ji mezheba şîeyanin û koka wan ji wir tê, 600 hezar kurdên feylî li paytexta Bexdayê û tevahiya bajar û bajarokên Êraqê bi darê zorê dersînor kirin û berê wan da dewleta Îranê.
Rejîmê, nasnameya hemlatîtiya êraqîbûna wan û temamî dokumanterên wan ên hemwelatîtiyê betal kirin, dest danî ser mal û milkên wan, zêdetirî 20 hezar ciwan kirin zindanê, winda kirin û heta îro jî çarenûsa wan nayê zanîn.
Di roja meya îro de li ser azadbûna 17 salan ji ketin û nemana rejîma baasa Êraqê, hîn jî mafê kurdên feylî bi temamî nehatine dayîn û hîna jî ji ber wan qanûnên bê dadwer û neheq dijîn û birînên wan nehatîne sarêjkirin. Kurdên feylî li herêmên ew lê dijîn, rastî zehmetiyên ji ber aliyên şovên û tundrew tên.
Weke KNK’ê, di bîrewerîya vê karesata xemgîna li dijî beşekê resen ji civaka me ku kurdên feylî ne bi bîr tînin, bejna xwe li ber cangorî û zilmlêkiriyên vê fermanê ditewînin, daxwazê ji hikûmet û desthilatdariya başûrê Kurdistanê û hemû partî, hêz û saziyan dikin ku li kurdên feylî xwedî derkevin û bi hev re hewl bidin vê zilma dîrokî ji ser wan rakin.
Di demê ku em piştevaniya xwe bo sekna aliyên dilsoz û xêrxwaz, bona vegerandin û parastina mafê kurdên feylî di hundirê Êraqê û Îranê û dîasporayê de dubare dikin. KNK soz dide ku dê hewlên xwe yên dîplomasî di hundirê welat û qada navneteweyî de dewam bike. Di vê arasteyê da em bang li hêz û aliyên Êraqê û Kurdistanê dikin ku piştevan û harîkarê hewlên me bin.
Vegerandina mafê desteserkiriyê kurdên feylî pêwistî bi yekrêzî û tifaqa me heye, tenê tevgerek milî û gelerî ya hundirîn, dikare bawerî û ewlehiya feyliyan di hêla civakî, siyasî, olî û mezhebî de vegerîne asta jîn û jiyara caran.”
