Heyetê Koordînasyonê Paştdayîşê Keyeyê Wayûbira yo ke hetê Rêxistina HDPyî ya Dêrsimî ra ame awankerdene, eşkerayîyêka nuştekîye weşanaye û venga pêro kesan da ke hêz bidê na kampanya.
Eşkerayîye de wina ame vatene: ”Vîrusê Korona pêro dinya de vila beno. Vîrus tewr taz tesîrê xizanan û kedkaran keno. AKPyo ke çimanê şarî de reş bîyo, pê vîrusê Korona keno ke payan ser vindero. Na çarçewe de ma dest pê Kampanyaya Keyeyî ya Wayûbira kerd. Seba naye ma koordînasyonêk amade kerd ke 6 kesan ra yeno meydan. Ganî nê prosesî de ma keyeyanê hewcedarîyan rê hetkarîye bikerê û hewcedarîyan peyda bikerê. Seba naye ma venga dêrsimijan danê ke paştî bidê kampanya.
Loqmeyê xo cîranê xo de pare bikere!
Hetê bînî ra Kongreya Awanî ya Dêrsimî zî ya ke merkezê ci Almanya de yo, ”Kampanyaya Çêyanê Wayeûbirayan” daye destpêkerdene. Kongre da zanayene ke ê çarçewa kampanya de Rêxistina HDPyî ya Dêrsimî reyde karanê hemparan bikerê û bi nê hawayî merkez û qezayanê Dêrsimî de komîsyonî awan kerdî. Nê komîsyonî do keyeyanê xizanan tesbît bikerê û keyeyo wayeûbira zî hesabanê banka yê înan rê 500 TL bierşawo. Kongreya Awanîye ya Dêrsimî eşkera kerd ke ê do hetkarîya 100 keyeyan bikerê. Eşkerayîye de wina ama vatene: ”Seba pawitişê rûmetê merdimanê ma yê xizanan paştî bide kampanya! Loqmeyê xo cîranê xo de pare bikere!”
Adresê emaîlî yê [email protected] ser o tewrbîyayîş eşkeno bêro kerdene. DÊRSIM
